Compilatiecorpus Historisch Nederlands 1.0 (CHN): ambtelijke teksten 1250-1800: leiden_1485_3

<begin>
</begin>
<main>
Alsoe by den printers onder den touwen bevonden is dat Gerijt Doe opgehadt heeft op drien touwen ende zijn eenen wever genoemt Dirc Hugenz heeft dat een laken laten scryven op Gerijt Aerntsz Brouwer ende doe vragedent dien printers Gerijt Aerntsz of hy ergens ophadde ende Gerijt voirs antwoirde neen hy des zijn die printers weder gegaen tot Dirc Hugenz ende seyden hem dattet Gerijt Aerntsz niet en hoirde ende doe antwoirde Dirc voirs den printers seggende dat hijs hemluyden niet seggen en woude ende diegene diet behoirde die soudent hem wel uutdregen als hy seyde ende want dit een onbehoirlike sake is den printeren ende dienaren van der stede soe toe te spreken ende hemluyden die waerheyt niet te seggen als si ommegaen int stick van horen dienste om dat te bewaren alst behoirt hiervoir sel Dirc Hugenz voirs een bedevairt doen tot Onser Liever Vrouwen tot Amersfoirde ende sel uutgaen op sijn bedevairt huyden binnen sdages sonneschijn ende morgen uut Rijnlant uut den Hage ende uut Hageambocht ende sel der stede van der voirs bedevairt een goet betoich seynden ende teynden dat betoich en sel Dirc voirs niet wedercomen binnen der stede van Leyden in Rijnlant in den Hage noch in Hagheambocht ten sel wesen by den meesten ommeseggen van den gherechte
</main>
<end>
</end>