Compilatiecorpus Historisch Nederlands 1.0 (CHN): ambtelijke teksten 1250-1800: leiden_1485_4

<begin>
</begin>
<main>
Alsoe die verwers van hoir veruloen nu ter tijt hebben willen te weten van den wollen 44 plack ende van den zwarten 64 ende soe die verwers hair verwen upgehouden hebben om dat voirs loen niet te willen verwen mits dat den stof geresen ende costeliker geworden is ende want die kuere inhout dat die verwers hoir loen niet hogen en moeten op zekere boeten dan by den gerechte ende wairdeynen soe ist dat tgerecht hieromme die vroescip ende wairdeyns byeengeropen ende vergadert hebben ende hebben dairtoe mede by hem geropen die verwers die meer eysschen te hebben voir hoir loen ende hebben voirt dairop gehoirt die van der draperye ende alsoe die verwers ende drapenieres by middele van den gerechte ende wairdeynen niet genoichliken en hebben connen overcomen soe is by den gerechte ende vroescip ende by den wairdeynen overdragen ende gesloten dat die verwers sullen hebben voir hoir loen te weten van den wollen 48 placken ende van den zwarten 69 placken ende dit gedurende tot Sinte Lucasdage toe naestcomende
</main>
<end>
</end>