Compilatiecorpus Historisch Nederlands 1.0 (CHN): ambtelijke teksten 1250-1800: leiden_1489_1

<begin>
</begin>
<main>
Huge Jansz Boll is zijn dingtail tiegens Roelof Hugenz ende Huge voirs die seyt dat hy Roelof voirn mit recht heeft doen besetten ende beclagen ende dat Roelof voirnt schuldich is voirt te gaen ende hem up te leggen ende te voldoen 32 Rijns gulden roerende van zijn leeringe van den volambocht als Huge voirs op Roelof voirnt verschenen zijn of 32 Rijns gulden dairvoir te geven nae inhout des ambochtsbriefs van den volambocht ende dat Roelof voirs hiervan tot gheenre ontschoude comen en sel mogen na den rechte van der stede alsoe trecht van den volres is soe wie een leerknaep annempt die en moet in drien jaeren gheen ander annemen ende alsoe Huge voirs den voirn Roelof angenomen heeft ende Roelof voirs dairenboven wechgeloopen is dair hy Huge voirnt groten hinder ende schade mede gedaen heeft soe seyt Huge voirs dat hy nae inhout hoir ambochtsbrief schuldich sel wesen den voirn Huge sijn leeringe te betalen of die voirs pennyngen dairvoir te geven ende dattet na den rechten van der stede niet schuldich en sel wesen te staen tot sijnre ontschoude mar dattet schuldich sel wesen uut te gaen tot bescheydenheyt van den goeden heeren van den gerechte Dit seyt Huge dat recht is des hy begeert vonnesse van scepenen ende eerst hierop gehoirt te wesen
Talman meester Gerijt Hereman
</main>
<end>
</end>