Compilatiecorpus Historisch Nederlands 1.0 (CHN): ambtelijke teksten 1250-1800: leiden_1489_2

<begin>
</begin>
<main>
Pieter Heynric Ottenz is zijn dingtail tiegens Kuert Indeman in den name van Wouter van Ennep ende Pieter voirs die seyt dat Kuert voirs hem mit onrechte heeft doen dagen ende beclagen ende dat hy Kuert voirs op sijn eyssche niet sculdich en sel wesen voir rechte te antwoirden Item of Kuert seggen woude dat Pieter voirs mit Wouter van Ennep zekere comanscip van leveringe van vier taerlingen lakenen gedaen heeft ende dieselve lakenen te leveren nae uutwysinge een hantscrift dat Pieter voirs dairof gegeven soude hebben ende voirt dat Pieter voirs datselve hantscrift sculdich soude wesen te kennen of te ontkennen mit veel meer andere exceptien die Coert voirs sel mogen proponeren ende voirtstellen dairop dat Pieter voirs seyt ende antwoirt hoe dat wair is dat hy tanderen tyden zekere comanscip van leveringe van lakenen gemaect ende gedaen heeft tiegen Wouter van Ennep voirs van welke lakenen voirs Pieter Heynricxz voirs eendeels doir informacie van Adriaen Florijsz gelevert heeft soeals doe geen vede noch oirloge in den lande en was ende eer den tijt quam van der anderde leveringe is gebuert dat in den lande van Hollant mits den innemen van der stede van Rotterdam ende der stede ende slote van Woerden grote oirloge opgeresen ende opgestaen zijn ende voirt in veel anderen landen hieromtrent dese landen van Hollant gelegen mits welke alle coopluyden mit horen goeden niet en mochten varen noch keeren te water noch te lande mar waren gevreest gevangen geslagen beroeft offte van den horen ontweldicht te worden geliken enen ygeliken dat wel indachtich is wairby dat Pieter voirs die lakenen van der anderde derde ende vierde leveringe niet gelevert en heeft soe alst geen tijt en was een van den zynen te scheyden sonder gelt dairby te hebben soe men niet en wiste of een leven of van den vyanden overvallen soude worden dan niet ende mede mits dat Wouter van Enneps goeden tot Rotterdam in handen van den vianden ende quaetwillende deser lande van Hollant waren mits welken te sorchliker was tot sulken tyden lakenen te leveren sonder gereet gelt dairby te hebben
ende voirt soe nae allen recht ende redenen nootsaken van oirloge eewe breken gelijc nu oirloge in dese lande van Hollant geweest heeft ende noch is ende soe Pieter voirs tiegens Kuert voirs selver geen comanscip gedaen noch tiegen hem uutstaende en heeft ende thantscrift dat Kuert thoent niet en hout houder sbriefe soe seyt Pieter voirs ende concludeert dat hy Kuert voirs niet sculdich en sel wesen te antwoirden ofte enige kennesse ende ontkennesse tiegen hem te doen mar indien Wouter van Ennep op hem yet te seggen off te spreken heeft al wair of dattet zy off roeren mach Wouter voirs come selve hy sel hem mit rechte of mit vrientscip doen dat hy schuldich sel wesen van doen Dit seyt Pieter voirs dat recht is begeert des vonnesse van scepenen ende eerst hierop gehoirt te wesen
</main>
<end>
Actum XVII dagen in Februario by Symon Zybrantsz
</end>