Compilatiecorpus Historisch Nederlands 1.0 (CHN): ambtelijke teksten 1250-1800: leiden_1489_3

<begin>
</begin>
<main>
1. Die scout van Leyden als een rechter van tsheren wegen is zijn dingtael tegens Jan Pietersz ende den rechter seyt hem an dat hy enen genoemt Huge Bol kairden vercoft heeft ende heeft hem dieselve pennyngen van de kairden ofgeslegen ende gecort van sijn arbeytsloen twelck dat is contrarye der kuere ende hoir ambochtsbrief dair die gezwoerens van den volambochte den voirn Pieter of bekuert hebben als recht is ende seggen hem an dat hy dairan verbuert heeft na inhout der kuere alsoe den rechter tgene dat voirs staet betugen ende wair maken sel mit die vier gezwoerens ende alsoe den heere alle sijn brueken ende boeten mit tugen inwinnen mach soe seyt hy als een rechter van tsheren wegen dat Pieter hiervan tot geenre ontscoude comen en sel mogen mer dattet staen sel tot kennisse van den voirs gezwoerens van den volambochte ende na inhout der kuere die dairof is ende seyt dat dit recht is des hy begeert vonnisse van scepenen ende eerst hierop gehoirt te wesen mit die getugenisse van den ghezwoerens
Actum XXVI dagen in Mairte
2. Jan Pietersz is zijn dingtael tegens here Adriaen van Poelgeest ridder scout tot Leyden als een rechter van mijns genadichs heren wegen ende Jan Pietersz voirs die seyt dat den rechter hem mit onrecht heeft doen dagen ende beclagen ende dat hy dat mit recht gekeert heeft alsoe den rechter seggen wil dat hy Huge Bol kairden vercoft soude hebben in ofcortinge van sijn arbeytsloen dair Jan voirs op antwoirt ende seyt dat hy dair al toe doen wil dat hy van rechtswegen sculdich is te doen dat hy geen kairden ten ofslach van arbeytsloen noch over arbeytsloen gegeven en heeft noch die brueke die den rechter hem eysscht niet en heeft verbuert noch dattet den rechter hem niet en sel mogen overtugen als recht is mit twie wittachtige tugen na inhout des ambochtsbriefs dat hy die brueke verbuert soude mogen hebben alsoe den ambochtsbrief inhout int 22ste artikel behoudeliken dat nyement in de voirs brueke bevallen en sel tenzy dat hem dat mit twie wittachtige tugen of meer over bevonden sel worden Voirt soe seyt Jan Pietersz voirs dat Huge Bol dair hy dese brueke tegen misdaen soude hebben op die tijt doe dese comanscip geschiede sijn volre niet en was dan lange dairna eerst sijn volre worde ende alsoet op die tijt sijn volre niet en was soe mocht Jan voirs op die tijt tegen Huge voirn wel comanscippen dan Jan voirs wil wel zweeren ten heyligen dat hy hem geen kairden over sijn arbeytsloen gegeven en heeft zeder die tijt dat Huge sijn voller geweest heeft By dese voirs redenen seyt Jan voirseyt dat hy van des rechters eyssch ende aensprake sel wesen vry ende quijt ende comen ende staen sel dairof tot sijnre ontsculde na den recht van der stede Dit seyt Jan Pietersz dat recht is des hy begeert vonnisse van scepenen ende eerst hierop gehoirt te wesen
Actum den XXVIen dach in Mairte anno LXXXIX Talman meester Gerijt Hereman
3. Aldus soe wysen scepenen dat na den tugen ende bescheyden die scepenen gehoirt hebben van den gesworen van den volambochte dat Jan Pietersz als drapeniere Huge Boll zijn volre betaelt heeft gehadt ende zijn arbeytsvollenloen gecort ende ofgeslegen mit sulke pennyngen als hy Jan Pietersz sculdich was van kaerden twelke dat is contrarie der kuere van der betalinge van den volres loen dat die schout als een rechter van tsheeren wegen Jan Pietersz terecht gedaecht ende toegesproken heeft ende boetsculdich is nae inhout der kuere ende geven den schout die kennync gewonnen ende Jan voirs verloren
Actum XXI dagen in Meye anno LXXXIX
</main>
<end>
</end>