Compilatiecorpus Historisch Nederlands 1.0 (CHN): ambtelijke teksten 1250-1800: leiden_1512_1

<begin>
Wy Dirck van der Boechorst ende Jan Aerntsz van Beringen scepenen in Leyden oirkonden
</begin>
<main>
dat voir ons quam Jan Willemsz wever ende geliede dat hy vercoft heeft Loy Claesz Smit een huys ende erve gelegen buyten die Reynsburgerpoort binnen der vryheyt van Leyden ende heeft belegen an die een syde Florijs Willemsz ende an die ander syde derfgenamen van Jan Heynricxz die Bastart streckende voir van de straet after an Willem Gerijtszs erve Ende Jan Willemsz voirs ende Pieter Heerman wever loveden mit gesamender hant ende elcx voir al Loy Claesz voirn dit voirs huys ende erve te waeren jair ende dach als recht is ende allen comer of te doen die dair nu ter tijt up staet sonder zeventien comans groten ende twie penningen payments tsjairs mitten houde ende Jan Willemsz voirs lovede Pieter Heerman voirn hierof schadeloes te houden Voirt zoe geliede hem Jan Willemsz voirs van dese coepe wel voldaen ende betaelt den lesten penninck mitten eersten
</main>
<end>
In oirkonden desen brief bezegelt mit onsen segelen int jair ons Heeren duysent vijfhondert ende twaleff upten seventienden dach in Januario
H Florijsz
</end>