Compilatiecorpus Historisch Nederlands 1.0 (CHN): ambtelijke teksten 1250-1800: leiden_1516_1

<begin>
Wy schout burgermeesteren scepenen ende raide der stede van Leyden doen condt allen luyden
</begin>
<main>
dat wy by consent ende goetduncken van der vroscepe van der voirs stede wegen geaccordeert ende overgecomen sijn mit heeren Gerijt van Lochorst ridder van den lande die hy leggende heeft buyten die Coepoerte in den ambocht van Zoeterwoudt naest den ramen in der manieren hiernae verclaert Dats te weten dat heeren Gerijt voirs der voirn stede leveren zel van tvoirs landt zevenhondert drie ende twintich roeden ende een vierendeel van een roede te weten vijf ende tsestich roden ende negen voet lang ende elff roden breet om by der voirs stede of by andere personen dairup te zetten ende te stellen alzoeveel ramen als zy mitter stede overcomen zullen ende zullen voirt diezelve ramen als die geset ende gestelt zijn begraven mit sloten off mit graften zoe diezelve raemsetters by den gerechte geordoneert ende bevolen zel zijn Ende die voirs raemsetters zullen gehouden wesen den voirn heeren Gerijt van Lochorst te geven van elcke rode lants thien penningen comans payments tsjairs mitten houde belopende up elcken raem tsjairs viertien comans groten ende eenen penning payments gelijck dat blijct by den brieven die de stede denzelven raemsetters dairoff geven zel te betalen alle jair tot Voirscoten ende Valckenburger marcten dairoff teerste jair renten verschynen sel tot Voerscoten ende Valckenburger marcten int jair vijftien hondert ende zeventien naestcomende ende zoe voirt van jaire te jare dese voirs renten te betalen Ende tot welcker tijt dat eenich van den voirs ramen comen in coepe of in besterfte zoe zel men dien raem die in cope off in besterfte comt vervoirhuyren mit halff den renten dairup staende Ende die burgermeesteren zullen den copers van de voirs ramen diezelve ramen in der manieren voirs waeren ende dat gedaen zijnde zoe zel die stede vry ende quijt wesen van alle actie anseggen ende toezeggen als die voirs heeren Gerijt ter cause van de voirs zevenhondert drie ende twintich roden ende een vierendeel van een rode lants dair die voirs ramen up geset zijn jegens der voirn stede zoude moegen pretenderen ende desen voirs brieff zel dairmede doot ende te niet wesen Ende hieroff zijn twie brieven dairoff dat heeft die voirs stede den eenen ende heeren Gerijt voirn den anderen
</main>
<end>
In kennisse der wairheyt zoe hebben wy desen brieve besegelt mit der stede zegele van Leyden die wy dagelicx gebruycken ende om der meere zekerhede zoe hebben wy Cornelis Mast ende Willem Willemsz scepenen in Leyden desen brieve mede besegelt mit onsen zegelen hieran gehangen int jair ons Heeren duysent vijfhondert ende zestien upten twie ende twintichsten dach in Julio
Florijs Willemsz
</end>