Compilatiecorpus Historisch Nederlands 1.0 (CHN): ambtelijke teksten 1250-1800: leiden_1519_2

<begin>
</begin>
<main>
Alzoe eenen zekeren tijt geleden ende tot nu toe die comanscepe comende van Calis zeer sober geweest is omdat tot Calis geen ofte zeer weynich vellen te gecrygen en waeren ende dat diezelve vellen dairvan comende van snooden prysen geweest zijn ende doir dien die neringe zeer gedeclineert ende geslapt is in zulcken schijn dat den armen ambochtsman weynich ofte niet te doen gehadt en heeft ende dat om dairinne te voirsien ende remedieren tgerecht tot twie reysen zeer vriendelicken mit doechdelicke vermaningen ende goede manieren an der stapule gescreven hebben ende versocht dat zyluyden die voirs stapule soude willen voirsien van zoeveel vellen ende tot zulcken redelicken pryse dairan onse poorteren hem zouden moegen behouden zoedat uuyt dien ende andere notable redenen in denzelven brieven begrepen die voirs van der staple wederomme an der stede gescreven hebben alsdat sy een zekere vloete mit vellen ende wolle gesceept hebben die zy mitten eersten bequamen claren hemel ende mit goet weder ende wint verwachten diewelcke brieven ontfangen hebbende tgerecht van stonden an by hem ontboden hebben die wairdeyns ende mit hem beraden om te weten hoe ende in wat manieren dat men ten meesten oirboir van der stede ende welvaren van de gansche gemeente zekere quantiteyt ende getal van vellen in der stede zouden moegen gecrigen updat den armen schamelen ambochtsman zijn broot mochte winnen ende eetende blyven ende onder andere woirden ende commanicacie dairup gehadt zoe is gesloten dat men een gemeente delinge zoude maecken ende ommedregen dat alle diegene die dairin wilden wesen zouden dairin moegen wezen ende dair oick in moegen delen zoeveel als een van den reysers te weten tot achte coope toe ende dair beneden zoe hem dat best gelegen is Ende omdat die menichte van coepluyden ofte uuytreysers die comanscepe niet en souden verdieren ende om der gemeenten profyte te doen zoe was oick gesloten die wairdeyns een groot deel van den reysers up gescryfte zouden stellen om dairuuyt te kiesen zes personen om diezelve reyse te doen soedat om sonderlinge ende merckelicke redenen den gerechte ende wairdeyns dairtoe porrende zyluyden mit rype deliberacie dairtoe gecoeren hebben Willem Jacopsz Heynrick Dircxz Adriaen Aerntsz Claes Martijnsz Dirck Aelbrechtsz ende Cornelis Jacopsz van Soetermeer Nu ist gebuert dat Cornelis Woutersz backer ende Joest Hugenz backer gecomen sijn by den gerechte ende hebben geseyt dat zy mede begeerden te reysen tot Calis ende als hem by den gerechte geseyt was hoe datter een gemeente delinge upgezet was ende dat zy dairin wezen mochten indien zy wilden soe hebben zy geseyt dat zy oik poorters waeren ende zoe wel behoirden te reysen als andere ende onder andere heete woirden zoe heeft Cornelis Woutersz backer geseyt dat indien hy niet en reysde tzoude een commocie moegen maecken onder die gemeente twelck worden zijn die niet en betamen gesproken te zijn hiervoir zel Cornelis Woutersz voirs doen verwercken an der stede vesten drie duysent stiens ende dairenboven zoe sel die voirs Cornelis Woutersz upt eerste dat die schout mit tmerendeel van den scepenen zit ende dinget comen in der vierschair bloetshoofts ende ongegordt ende bidden den gerechte dat zoe wes zijn correxie min bedraecht dan zijn misdaet dat zyluyden hem dat vergeven willen om Goids willen
</main>
<end>
</end>