Compilatiecorpus Historisch Nederlands 1.0 (CHN): ambtelijke teksten 1250-1800: leiden_1535_1

<begin>
Is geopent by monde van meester Willem van Oy doctor in den rechten burgermeester
</begin>
<main>
hoe dat die burgermeesteren dezer stede by verscheyden personen geadverteert worden ende van eenige verstaen hebben alsdat die Spangaerts Franchoysen Ytalianen ende andere nacien zeer geaffecteert worden om onse laeckenen te coepen meer dan tot andere tyden ende beter gadinge dairinne souden hebben dan in andere laeckenen deser lande zoe verde tgroote segel van onse laeckenen zoe groot ende notabel gemaect waer gelijck hoerluyder zegelen want zyluyden alsdan onse laeckenen veel meer ende beter souden weeten te vercopen ende te slyten dan zy nu ter tijt weeten te doen soedat mijn heeren van den gerechte hierup mitten wairdeyns ende eenige van de notabelste der draperye hebben gecommuniceert die tzelfde wel soude goetduncken zulcx te doen zoe en hebben nochtans mijn heeren van den gerechte tzelfde niet begeert om doen buyten consent advijs ende goetduncken van mijn heeren van de vroescepe zoe zy moegen verstaen ende weeten dat niet goet en is lichtelick een zegel te veranderen omme die periculen die dairuuyt zouden moegen gebueren want eenige souden moegen peynsen ende overdencken tniyt wat zaecke ende wairomme tzelfde zulcx verandert zoude moegen wesen mit breder verhael ter materie dienende soedat hierup eendrachtelicken gestemmet ende gesloeten is alsdat men tzelfde segel vermeerderen zal zoeveel alst zal moegen verdragen om mit eenre penne geslegen ende genijt te worden mits altijts houdende dezelve printe wapen ende upgeserifte gelijck dat nu ter tijt geuseert wordt ende dat men den coepluyden hiervan in den besten zel adverteren ende verclaeren unyt wat zaecke tzelfde gedaen ende gebuert is geweest
</main>
<end>
</end>