Compilatiecorpus Historisch Nederlands 1.0 (CHN): ambtelijke teksten 1250-1800: leiden_1538_2

<begin>
Wy Jacop Cornelisz Gorter ende Cornelis Paeds schepenen in Leyden oirkonden ende certificieren voir de gerechte wairheyt
</begin>
<main>
hoe dat up huyden datum van desen voer den gerechte der voors stede gecomen zijn Jacop Claesz oudt omtrent
52 jaeren ende Pieter Symonsz oudt omtrent 58 jaeren medegezwoerens van den weefambochte der voors stede van Leyden ende tugeden by hoeren gestaefden eede die zy elcx volcomelicken daertoe deden mit upgeheven hande ende uuytgestrecte vingeren als recht is zoe zyluyden ten versoecke van den burgermeesteren der voors stede rechtelicken daertoe gebrocht zijn hoe dat zy deposanten upten negenden Septembris lestleden tusschen der voors stede ende Leyderdorp meest omtrent derzelver stede bevonden hebben zulcx als hiernae volcht
Eerst ten huyse van Jan Pietersz veel wols hem toebehoerende werckende mit een weeftouwe ende noch veel wols toebehoerende die Minrebroederen zoe hy seyde Noch ten huyse van Willem Jansz oick veel wols werckende mit twie weeftouwen Noch ten huyse van Harper Huygenz weynich wols mer veel wollegaeren werckende mit een weeftouwe ende hadde noch twie gelycke touwen leech staende Noch ten huyse van Neeltgen Heynrick Joestenzs wede oick veel wols Noch ten huyse van Pietertgen die wever weynich wols werckende mit een weeftouwe Noch ten huyse van Jan Pietersz sceepmaker oick veel wols mer gheen weeftouwe Noch ten huyse van Jannetgen Roelen mede veel wols ende vellen werckende mit een weeftouwe Noch ten huyse van Cornelis Slocgen weynich wols oick werckende mit een weeftouwe Noch ten huyse van Frans Pieter Monwerijnsz veel wols zonder eenige weeftouwe ende noch ten hayse van Huych Craen vijf weeftouwen dairmede werckende om loen Seggen voerts dat hemluyden wel kennelic is alsdat in een huys staende tipte wech dat men gaet nae de Minrebroederen buyten Leyden toebehoerende Jan Aerntsz dagelicx veel laeckens gereedt wordt ende zouden oick in denzelven huyse hebben gegaen ten hadde belet geweest dat die vrouwe van den huyse doot upte vloer stonde van kinde Ende wandt godlick ende verdienstelick is in allen rechtvaerdigen zaicken der waerheyt getuychnisse te geven als men des versocht wordt
</main>
<end>
soe hebben wy scepenen voors des versocht zijnde dezen brief bezegelt mit onsen zegelen hieran gehangen int jaer ons Heeren duysent vijfhondert acht ende dertich upten elften dach in Septembri
</end>