Compilatiecorpus Historisch Nederlands 1.0 (CHN): ambtelijke teksten 1250-1800: leiden_1538_3

<begin>
Alzoe binnen deser stede ende dairomtrent grote ongeregeltheyt dagelicx onderhouden ende geuseert wordt int stuck van tkaerden van verscheyden wolle ende om dairinne te remedieren ende te voirsien soe hebben die van de gerechte geordonneert ende ordonneren mits desen hoe ende in wat manieren men voirtan zel moegen kaerden ende anders niet ende dat gelijck hiernae volgende is
</begin>
<main>
1. Eerst dat alle dieghene tzy mannen ofte vrouwen ende die neringe van der draperie kemmen ofte spinnen niet en doen ende hemluyden mit wolle te kaerden binnen Leyden zullen willen behelpen tzy dat zy gezoeden graeuwe wolle meyngede grauwe wolle of lijst kaerden willen zullen eerst ende alvoeren zy tselve doen zullen comen opter paertsen by den wairdeyns ende laeten aldaer hair namen toenamen ende tmerck dair hair kairden mede gemerct zullen wesen opscryven ende teyckenen
2. Welcke kaerden by den wairdeyns alzoe ontfangen wezende zullen geijct worden mitter stede teycken twelck den wairdeyns by den gerechte aldair toe geordonneert zal wesen
3. Voerts zoe wye begeert te kaerden gemeyngede of gezoeden graeuwe wolle ende volbrocht heeft dat voirs is die zal gehouden wesen elcx zijn kaerden dairvan op hem zelven te hebben ende zullen eer zy kaerden willen comen mitten gheenen die de wolle die zy kaerden zullen toebehoert by den wairdeyns ende denzelven aldair zeggen by haeren eede die zy zoewel die drapenierder als dieghene die de wolle kairden zal daertoe doen zullen hoevele zy van die wolle begeeren te kaerden of gekaert te hebben ende wanneer zyluyden die wolle van de gemeyngede ofte gezoeden graeuwe in den manieren verhaelt gekaert zullen hebben dat zyluyden alsdan terstont diezelve kaerden telcken brengen zullen opter stede paertse in handen van denghenen dair zy die of ontfangen zullen hebben
4. Van gelycken alle die lijst kaerden willen zullen dairvan hebben hair kairden op hem zelven ende in alre manieren geijct gemerct ende by den wairdeyns opgescreven als voirs is mer men zal geene gemeyngde wolle moegen kairden mit kaerden dair lijst mede gekaert zal wesen
5. Ende zoe wye eenige ghezoeden graeuwe wolle meyngede graeuwe wolle of lijst willen doen kaerden zullen tzelve moegen doen doen van zulcken personen als voirs is ende binnen der poerten ofte muyeren der stede van Leyden elcx binnen hoeren huysen ofte erven dair zy woenachtich zijn ende anders nerghens ende dat mit zulcke kaerden geijct ende gemerct als voirs staet zonder dat tzelve gheenichsins zal moegen geboeren in eenigen drapenierdershuysen erven ofte schuyeren dair zy inne ofte up wonachtig zijn ofte in hair gebruycke coop ofte huyer hebben behoudelick ende wel verstaende dat men wel sal moegen lijst doen kaerden buyten vierhondert roeden ronsom Leyden van den uutcant der stede vesten zonder verboeren
6. Item ware yemant die doir eenige saecken tkaerden wilde laeten ende hem mit kemmen spinnen ofte elders mede wilde behelpen die neringe der draperie angaende zal eer hy sulcx zal moegen doen zijn kaerden onder den wairdeyns opter paersen brengen ende aldair laten berusten zoe lange hy hem mit spinnen kemmen ofte andersins mit wolle soude willen behelpen
7. Ende en sal nyemant enighe kairden tot enigen tyden binnen zijn huysen moegen hebben dair enige wolle mede gekaert is dan in der manieren geijct ende geteykent als voirs staet
8. Ende dit al upte boete van thien pondt ende dairtoe gecorrigiert te worden by den meesten ommezeggen van den gerechte
</main>
<end>
</end>