Compilatiecorpus Historisch Nederlands 1.0 (CHN): ambtelijke teksten 1250-1800: leiden_1563_3

<begin>
Alsoe Reynout die verwer van Delft den gerechte van Leyden te kennen gegeven heeft
</begin>
<main>
dat hy gaern bynnen Leyden verwen soude hoepende ende betrouwende soe te verwen de Leytsche laeckenen datter gheen crusers van verwen vallen en souden dye nyet gesegelt en werden ende dat soe verde de stadt hem soude willen assisteren buyten haere schaede mitte stoffe van 24 balen weets ende een pype mede om vier cuypen mede te verwen sonder meer soe ist dat die van den gerechte hierop gedelibereert hebbende den voirs Reynoudt tot zyner ernstiger versoucke ende begeerte geconsenteert hebben te doen leveren tot een prouff van sijn verwerye de voirs 24 baelen ende een pype mede Des sal Claes Jansz de Guede by advijs van denselven Reynout ende tot synen prouffite die calanten die begeren haere laeckenen van hem geverwet te hebben aennemen die denselven Claes Jansz mede toeseggen ende beloeven sullen die pennyngen van tverwen gereet te betaelen ende sal deselffde daer rekenynge van voeren ende houden tot versekerheyt van der stede omme te geraecken tot haere gedebourseerde pennyngen ende wes prouffyten dairenboeven van coemen de stede geremburseert zijnde sullen volgen den voirs Reynout wel verstaende dat men geen ander weet leveren en sal voordat de rekennynge gemaict is van den cuype die geverwet is ende behoudelycken indien bevonden werdt dat de lakenen van de eerste cuype ofte enighe andere cuypen nyet geverwet en sijn alst behoirt ende hy aengenoemen heeft te doen ofte dat deerste ofte andere cupen uuytgingen soedat daer gheen oft weynich prouffijts van coemen soude dat de regierders van Leydeu gheen stoff meer gehouden en sullen sijn te leveren noch oyck gheen stoffe meer dan vooren verhaelt is al waert oyck soe dat de laeckenen van alle de vier cuypen wel geblauwet ende geverwet waeren Ende alsoe die voirs Reynout hiermede tevreden is geweest zoe sijn hiervan gemaict twee cedullen by den secretarijs der voirs stede van der stede wegen
</main>
<end>
ende by den voorn Reynout ondergeteyckent upten derthienden Martii anno XVC dri en tsestich nae gemeen scryven
J DYE MILDE REYNOUT CORNELISZ
</end>