Compilatiecorpus Historisch Nederlands 1.0 (CHN): ambtelijke teksten 1250-1800: leiden_1563_8

<begin>
Is voorts geopent by monde 1
</begin>
<main>
hoe dat onlancx geleden ten versouck van enige van der draperie ende andere enige begerende te reden fyner Engelsche wolle dan des lange bynnen Leyden gereet is ende andere laeckenen te maicken van hierlantsche wolle seven persoenen geëligeert sijn geweest by mijn heeren dye tsaemen communiceren ende overbrengen souden ofte tselffde de stede van Leyden oirbairlycken ende scaedelycken sijn soude ende haere besoinge ende opinie stellen souden by gescrifte ende tselffde verthonen dye van der vroetscappe volgende welcke deselffde vergaedert sijn geweest Ende hebben vier van den seven verclaert dat hem goet soude duncken dat men soude moegen consenteren lakenen te reden van hierlantsche wolle soe goet ende quaet als een yegelijck soude goetduncken mer gheen lappen geduyerende tot wederseggen van den gerechte ende nyet langer dewelcke souden lancg wesen 28 ellen rau uuyt den touwe ende twintich ellen blyvende een weynich min ofte meer en thien vierendeel breet behoudelycken dat men deselffde gheen loot geven en soude ymmers tLeytsche teycken hebbende
Item twee van den seven dochte dat men eerst soude bezoucken de rederye van fyner Engelsche wolle om fyner laeckenen te maicken dan men dus lange gedaen heeft ende besien off die den coopman aengenaem soude zijn ende dat men soe lange ophouden soude mit de rederie van laeckenen van hierlantsche wolle mer als die stemmen daer nyet toeloepen en wilden mer dat men de rederye van hierlantsche wolle consenteren wilde dat men alsdan daermede procederen soude als die vier andere geraemt hadden
Item een van den seven hadde goetgedocht dat men teenemael bezoucken soude beyde de voirs rederyen geduyrende tot wederseggen van den gerechte ende wes men bevindt de stadt oirboirlijcxste te sijn dat men daerby blyven souden ende dat dye rederye van der hierlantsche wolle geschien soude in manieren voeren verhaelt
naer die van der vroetscappe hierup tsamen gecommuniceert hadden hebben geresolveert dat sy consenteren dat men sal moegen beginnen te reden alhier bynnen Leyden gemerct de cranckheyt ende slappicheyt van der ouder draperie laeckenen ende gheen lappen van hierlantsche wolle soe goet ende quaet als een yegelijck goetduncken sal geduyerende tot wederseggen van den gerechte ende nyet langer behoudelycken dat deselffde gheen loot hebben en sullen ymmers van tLeytsche teycken ende dat van sulcke langte ende breedte als by den gedeputeerde geraemt is een beynich meerder ofte min Ende dat men mede teenemael sal moegen bezoucken de rederye van fyner Engelsche wollen dan men dus lange gere[e]t heeft mer men sal daer nyet innen moegen treden voor ende aleer up beyde de voirs rederyen zeeckere ordonnantien gemaict ende gepubliceert sullen sijn uuytgesondert treeden van een poket fyner wolle dat eens by provisie geconsenteert is geweest Ende omme te maicken de voirs ordonnantie sijn geëligeert de seven persoenen dye voirtijts geëligeert sijn geweest om van dese saecke te communiceren midts nochtans dat vijff van hemluyden in absentie van den andere sullen moegen besoingeren ende sullen elcx hebben van elcke ure dat zy besoingeren drye stuvers ende by hem nemende de secretarijs deser stede
</main>
<end>
</end>