Compilatiecorpus Historisch Nederlands 1.0 (CHN): ambtelijke teksten 1250-1800: leiden_1565_1

<begin>
Is mede geproponeert by monde 1
</begin>
<main>
dat Reynout Cornelisz verwer in Octobri ao XVC LXI tot vordernisse van de draperie deser stede alhier gecoemen sijnde eyntelicken deur hulp ende assistentie van zeeckere somme van gelde hem uuyter beurse deser stede in zijn verwerie geëmployeert breder blyckende by de resolutie van de vroeschappe van date den Ven Julii ao XVC LXIII zoevele hadde gedaen dat de gemeene drapiers deser stede elcke laecken tot veel minder pryse hadden moegen doen blaeuwen ende verwen dan zy van te vooren gewoonlick waeren te doen Tis nu soe dat de voors Reynout Cornelisz by zeeckere requeste in der vroetschappe gelesen te kennen heeft gegeven dat hy mits de cleynheyt van de cuypen zijn weet ten oorbaer niet en mochte doen uuytblaeuwen noch zijn laeckenen regieren ende dat mede het weet dagelicx een derdendeel lichter van deuchde viel dant hier voormaels plach te wesen ende mitsdien versocht hadde dat tot zynen behouff uuyt deser stede beurse zekere verwerie ofte ten minsten zeeckere groote ende bequame cuypen van zes ofte zeven baelen weets gecoft mochten werden ende dat tzelfde oock als der neringhe van de draperye zeer profitelicken wesende by de gemeene drapiers genouchsaem is geadnoyeert blyckende by zeeckere andere requeste by 24 drapiers ondergeteyckent mede in der vroetschappe gelesen daerby zy onder andere causeren dat heure laeckenen deur die faulte van tverwen tot veel minder pryse dan die Haerlemsche laeckenen vercoft werden waerop van noode es te resolveren soedat hierup es gestemmet dat Ewout Aernt Gerijtszsz ende Quyrijn Claesz ende Claes Cornelis Jan Roelofsz by desen werden gecommitteert omme informatie ende inspectie te nemen van de cuypen zoe ten huyse van Jan van Bancken als van Wigger Harmans zoon borduyrwercker wesende ten eynde daeruuyt zoe groote ende bequame cuypen gecoft ende bestelt zullen moegen werden als die voors Reynout Cornelisz heeft versocht ende dat alle tzelfde die voors gecommitteerden dies aengaende zullen doen volcomen effect zal sorteren ende zijn voortgang hebben ende es denzelven Reynout zijn vorder versouck ontseyt
</main>
<end>
</end>