Compilatiecorpus Historisch Nederlands 1.0 (CHN): ambtelijke teksten 1250-1800: leiden_1565_2

<begin>
</begin>
<main>
Is mede geproponeert dat de burgermeesteren deser stede upten XXIIIen Juny ao XVc drie ende tzestich met Jacob van Dam woonende tot Leyderdorp geaccordeert ende overgecomen waren dat zy denzelfden van Dam voor zeeckeren tijt zouden leenen die somme van hondert ponden grooten Vlaems eens ofte ten minsten haer gelooff interponeren zouden ten eynde daermede by Reynout Cornelisz de verwer Leytsche laeckenen geverwet zouden werden ende dat zy by provisie denzelfden Reynout zoeveel gelts leenen ofte heur gelooff interponeren zouden omme een prouff van twaelf baelen weets een baeltgen aluyns ende een pype meets te gecrygen
des zoude de voors van Dam beloven die burgermeesteren te rembourseren van heure verschoten penningen ende hem daervan volcomelicken te bevryen breder blyckende by den accorde daervan zijnde twelck by de gerechte ende vroetschappe opten Ve Julii ao XVC drie ende tzestich was geapprobeert ende geadnoyeert zoedat die voors prouff goet bevonden zijnde die voors Reynout daernae zeeckere verwerie ten huyse van Jan van Bancken was bestelt omme zijn kunst van tverwen tot profijt ende eere deser stede ende den drapiers van dien te exerceren mits dat nochtans dezelfde Bancken mitsgaders Claes Cornelis Jan Roelofsz ende Ewout Aerntsz tot indemniteyt van deser stede die materialen coopen ende van de kuypen by den voors Reynout geverwet rekeninghe ende bewijs die van de gerechte tot allen tyden des vermaent zijnde doen zouden mits dat de winst over ende boven alle costen tot profyte van den voors Reynout zoude comen ende dat zulcx den voortgang van de hanteringhe van denzelven Reynout geleert hadde dat die laeckenen by hem geverwet zeer goet waren bevonden ende in de voors verwerie tot veel minder pryse dan by andere verwers geverwet werden waerdoer allen de drapiers deser stede groffelijck hadden geproffiteert ende geschapen waren by successie van tyde noch meer te proffiteren ende zulcx dat oock de neringhe van de draperie deser stede deur dien vermeerdert zoude moegen werden ende dat denzelfden Reynout int respect van dien tipten IXen Mey lestleden by der gemeene vroetschappe zeeckere twee grooter cuypen waeren geaccordeert
</main>
<end>
</end>