Compilatiecorpus Historisch Nederlands 1.0 (CHN): ambtelijke teksten 1250-1800: leiden_1587_6

<begin>
Wy schout burgermeesteren ende regierders der stad Leyden des graefschaps van Hollandt aenbieden enen iegelycken naer zijn wezen staet ende waerde onze minnelycke groetenisse
</begin>
<main>
Alzoe wy in tzeecker onderrecht zijn ende verstaen hebben dat uyt dezer stede die van outs herwaerts altijts gestaen heeft opt stuc van de draperye off redinge van lakenen gelijc die alsnoch doet verscheyden stucken van degenen die men alhier redende ende makende is naer die ter warandize gepasseert ende wit opgeloyt zijn ooc wit werden uytgevoert omme by de eygenaers van dien tot zodanige plaetze ende in zulcken verwe als hun goet dunct te werden geverwet ende dat vele van dien by lieden hem mit geen redelicke winsten vergenougende mer door onbehoirlicke wegen mit schade ende bederff van andere tot onbehoirlycke rijcdommen trachtende tot ander plaetzen in quade ende onbehoirlycke stoffen werden gedaen zwarten daerdoer niet alleen vele lieden grootelicx werden misleyt off bedrogen zonderlinge die dezelve zonder naerder insicht off bedencken opt zegel copen dewelcke hem innebeelden alsoff zy dezelve verwe binnen dezer stede hadden becomen ende overzulcx voorgaende behoorlicken mit weet off pastel zouden zijn geblaeut mer ooc dese stede onverwinlycke schade zoude comen te lyden in hare eere neringe ende welvaren een zake daer ons ende onze gemeente zoe hoochlicken es gelegen omme waerinne voor zoevele ons mogelycken is te voorzien wy eenen yegelycken mits dezen wel hebben willen te kennen geven ende verwittigen dat wy gene laeckenen bayen sayen greynen off andere wercken die men binnen deser stede maeckende ofte werckende is ende voortsaen maecken off wercken zal en houden noch en achten binnen dezer stede zwart geverwet te wezen dan degene die men zal vinden gemerct geloyt ende gezegelt mit enige van de zegelen daervan de figuren hieronder staen affgedruct ende gemaect
dewelcke hebbende mach hem enen yegelycken houden voor verzeeckert dat die voorgaende binnen dezer stede geblaeut zijn alleenlicken ruit weet off pastel zonder eenige quade off onbehoirlycke stoffe daerby gecomen te wezen ende dat tot zulcken hoochde als tzegel medebrengen ende verclaren zal
Mit vorder verclaringe dat de stucken die men gezegelt vint mitte figuren C ende E geblaut zijn tot zodanige hoochde als de Leytsche lakenen van outs zijn geweest Dat die mit A off B réspectivelick gezegelt van hoger stael zijn mer mit D F G H I K lager d'een den anderen vervolgende Ten laetsten dat mit de zegelen van A B C D alleenlicken gestaelt werden lakenen mit de zegelen van E F G bayen ende mitte zegelen H I K niet anders dan saeyen ende grogreynen
Bidden en verzoucken daeromme gansch vruntlicken dat een yegelijc gelieve de jegenwoordige onze waerschouwinge ten besten te duyden ende nemen alzoe die kenne Godt niet en geschiet omme yemants neringe daermede te vercorten mer alleenlycken omme degene die ons Godt Almachtich genadelicken gelieft te verlenen te behouden mit enen wege te beletten dat die mit geen slinxe practycken en werden verminct gecrenct noch vermindert ende dat de onnosele deur misverstant niet en werden misleyt bedrogen noch beschadicht
</main>
<end>
Ende hebben des ten oirconden onzen zegel ten zaecken twele wy jegenwoordelijc gebruycken hieronder doen drucken ende by onzen secretarijs doen onderteykenen opten 13 Augusti 1587.
</end>