Compilatiecorpus Historisch Nederlands 1.0 (CHN): ambtelijke teksten 1250-1800: leiden_1637_2

<begin>
</begin>
<main>
Op huyden den 17en Augusti 1637, compareerden voor my Gerit van der Bouchorst notaris publijcq Jan Andriesz van Weert mr laeckenbereyder wonende binnen dese stede als huerder ter eenre ende Simon Marteau van Luyck ende jegenwoordich wonende binnen de voors stede als verhuerder ter andere syden ende verclaerden sy comparanten overeengecomen te sijn dat den voorn Simon Marteau by den voorn Jan Andriesz sal wercken ende leeren het hantwerek van droochscheeren gelijck Jan Andriesz den voorn Simon Marteau by desen aenneemt ende dat voor den tijt van een jaer innegaende van huyden date deses aff ende op dese naervolgende conditien Alsdat den voorn Jan Andriesz aen den voorn Simon Marteau geven sal 't eerste halff jaer alle weecke die hy sal comen te wercken 3 gulden ende vry drincken nae behooren ende de tijt die hy niet sal comen te wercken sal afgecort werden ende het 2e halff jaer 3 gulden 5 stuvers ter weecke ende vry drincken als voren mede met aftreck van den tijt dat hy Simon Marteau niet en sal comen te wercken Ende is voorts espresselick geconditioneert dat de voorn Simon Marteau by den voorn Jan Andriesz geduerich sal moeten wercken sonder hem middelertijt by een ander te mogen besteeden ofte verbinden ende ingevalle dat denselven Simon Marteau echter evenwel dienaengaende contrarie dede dat denselven Simon Marteau aen den voorn Jan Andriesz geven ende betaelen sal promptelic in gereden gelde een somme van 50 gulden Ende tot meerder verseeekertheyt van den voorn Jan Andriesz nopende 'tgeene voors is soo sijn mede voor my notaris voornoemt ende deselve getugen gecompareert Reynier Gerritsz drapier ende Anthonie Stevaert beyde drapiers wonende binnen dese stede ende hebben henselven tesaem ende niettemin elck in solidum ende voor 't geheel by desen gestelt borgen [enz]
</main>
<end>
</end>