Compilatiecorpus Historisch Nederlands 1.0 (CHN): ambtelijke teksten 1250-1800: leiden_1637_3

<begin>
</begin>
<main>
Op huyden den 17en September 1637, compareerden voor my Gerrit van der Bouchorst notaris publijck Phlips Cambien hoetbantmaecker Jan Monné drapier Jan Cornelisz van der Bandt wolverwer ende Herman Aelbertsz mede drapier alle wonende binnen dese stede dewelcke verclaerden geresolveert te zijn met malcanderen te treden in compagnie om wol te verwen gelijck sy doen by desen ende dat voor den tijt van 4 achtereenvolgende jaeren waervan 't eerste jaer ingaen sal van huyde date deses aff ende sullen alle de materialen ende stoffen daertoe van noode wesende ende eenichsints dienende by hen comparanten becosticht moeten werden elcx voor een gerecht 4e part gelijck sy comparanten mede daerentegens elcx voor een gerecht 4 part sullen trecken ende genieten de winsten die daervan boven alle oncosten sullen comen over te schieten
Verder is wel espresselick geconditioneert dat de veruwerie met de veruwketels geduerende den voors tijt van 4 jaeren sullen moeten blyven in de huysinge van den voorn Harman Albertsz ende alwaer die jegenwoordich is ende staen sonder middelertijt daer vandaen gehaelt te mogen werden ende op een ander gestelt te werden
Is voorts mede geconditioneert dat ingevalle bevonden werde dat yemant van hen comparanten met een ander in compagnie trede nopende het voors verwen off een ander quaeme te leren off jegens de voors compagnie tot nadeel streckende quaeme te doen directelick off indirectelick in wat manieren het soude mogen wesen dat een sodanigen verbeuren sal een somme van 100 Car guldens te appliceren voor d'een helfte ten proffyte van den armen van de Fransche gemeente deser stede ende voor d'ander helfte ten proffyte van den huyssittenarmen mede deser stede ende dat datelick beneffens de contraventie in gereden gelde te betaelen
Eyntelicken is mede wel expresselicken geconditioneert dat in gevalle yemant van de voors comparanten quaeme te overlyden binnen den voors tijt van 4 jaren off geduerende de compagnie sodanigen overledens huysvrouwe vermogen sal in haere overledens mans plaetse te succederen ende dat sonder tegenseggen van de andere overblysende comparanten ende dat ter tijt ende wylen toe sodanigen overledens wedue sal comen te herhylicken in welcken gevalle deselve gehouden sal wesen uyt de voors compagnie te scheyden ten waere met bewilliginge van de andere comparanten mits alsdan genietende haer gerecht aenpart in de voors compagnie 't welck alsdan bevonden sal werden over te schieten Tot naercominge [enz]
</main>
<end>
</end>