Compilatiecorpus Historisch Nederlands 1.0 (CHN): ambtelijke teksten 1250-1800: leuven_1323_1

<begin>
Ane alle Die ghene Die ghene die dese letteren selen zien ende horen lesen die nu sijn ende namaels sijn selen Scepene Ghesuorne Ende die Raet vander stad van louene salut ende kinnesse der waerheit wi doen v allen tewetene
</begin>
<main>
dat wi omme ghemein Orber der stad ende met ghemeinen consente ghemaect hebben ende gheordineert die pointe die hier na staen bescreuen vortaene vast ende ghestedech te houdene Jrstwerf dat nyman die vortaene der stad knape sijn sal op dat jaer dat hi der stad knape es en sal moghen dranc vercopen noch gheselle sin ane dranc noch tauerne houden jn eengher maniren noch oec molene te pachte nemen noch houden noch geselle sin ane molene ende soe wie dat dade hi soude verboren sinen dienst van der stad alsoe dat hi van dan vortaene nimmermeer jnder stad dyenste en soude moghen comen Jtem dat en gheen man op dat jaer dat hi ghesuoren sin sal vander stad van louene enghene molen te pachte en sal nemen noch houden noch gheselle sijn daer ane jn eengher maniren ende soe wat manne die ghesuoren wart vander stad op enech jaer molene ochte molen te pachte name ochte te pachte hielde ochte gheselle waere daer ane dat hi ter stad orbore niet en soude comen moghen noch ghedaecht sin daer ouer tecomene noch te ghenen orbore dat der stad ane ghinghe ende alsoe oec dat men elken die ghesuoren sin sal vortaene alse hi sinen eet doet sal mede doen sweren ten heyleghen dat hi op dat jaer noch molene te pachte en heft noch nemen en sal noch gheselle sijn daer ane jn eengher maniren Vortmeer dat soe wie die erf molene heft die ghesuoren sin sal dat hi op dat jaer dat hi ghesuoren es niet en sal weghen den beckeren hare broet noch die waghe draghen noch in handen hebben
</main>
<end>
Ende omme dat alle dese dinghe ghemaect sijn ende gheordineert met ghemeinen consente omme orber der stad ende vortaene vast ende ghestedech selen werden ghehouden Soe hebben wi Scepene ghesuorne ende raet vander stad van louene voreghenoemt der stad seghel ane dese letteren ghehanghen Ghemaect ende ghegheuen jn de jaere ons heren alse men scref Dusentech Driehondert ende Drientwintech sfrijdachs vore sinte jans dach Jnden somer
</end>