Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1254_1

<begin>
</begin>
<main>
Dit siin poynte van den bruederscape Sente loys Hoemen hulden sal
[1] Van desen daghe vortane salic goet ende ghetrouwe siin derbruederscap sente loys ende houden alle statute daer toe behoerende ende hare vrome meerren ende hare scade minderen na mine macht soe []mij god help ende die heilege vader sente loy
[2] Wie van den ghuldebruederen ter merghensprake niet ende quame te tide alst hem ware laten weten verborde v d louensche
[3] Vort wie jn dese bruederscap gheet sal gheuen viij d louensche ten stoele Ende xiiij d louensche te hulpen der bruederscap ende enen D louenschen den scriuere wie dit ghelt niet en gaue ten tide daer toe geset verborde v s louensche
[4] Vort soe wanneer eens guldebrueders zoene in dese bruederscap gheet sal hi geuen vj d louensche teenen gesetten tide te hulpen der bruederscap ende en gaue hise niet jntide hi verborde xij d louensche terbruederscap behoef
[5] Vort elc guldebrueder moet den anderen deilen sinen coep op dat hijs begert eert [goe]t dat ghec[ocht] [was] tgheens huus comen es diet cochte Wie daer jhegen dade verborde v s l[ouens]che
[6] Vort en mach nieman van der bruederscap buten der stat van mechelne gaen jegen wagene jhegen kerren hochte coemanne van ysere van stale van tenne ochte van anderen eere dat men smeet ofte colen also dat enegen van den anderen bruederen deren moghe Wie daer jegen dade verborde v s louensche
[7] Vort nieman van der bruederscap en mach siin werc vte leggen te cope op kerchoue hochte op andere gewide stat wie dat dade verborde x d louensche
[8] Vort war[t] dat zake dat enech brueder hem antrocke goet dat beiacht ware met dieftten met roue hochte met andere quaetheit dien selen dedekene ende deghesuorne manen dat hi aue sta van alselker quader winningen wie aldus ghemaent es ende hijs niet aue en stoede mensoudene leueren den werelleken gherechte ouer terechtene na de groetheit van siere mesdaet
[9] Vort wat cnapen vorwaerde maecte sinen meester tedienene tenen gesetten tide ende die cnape van sinen meester daerbinnen ghinghe ende hem an enen anderen meester voeghede tedienene ende dat vor dekene ende de ghesuorne quame daer af selen si de warheit ondervinden ende wart de meester mesdadech vonden soe verbort hi iij s louensche Ende es die cnape mesdadech soe verborthi ij s louensche ende die here die dien cnape ontfinc ver bort iij s louensche
[10] Vort waert dat zake dat enech twijst gheuiele tuschen enech van den bruederen ende hare cnapen sonder suaerlec de hant den enen an den anderen tedoene dat selen dedekene ende de ghesuorne aue legghen ende jeghelijc beide meester ende cnape sal gheuen ene ghelte wiins
[11] Vort van elcken cope van x s ende daer bouen die de guldebrueders vercopen sal men nemen enen almosen penninc de arme brueders met te onthoudene Ende hiir toe sal in elc smeds huus ene busse hancghen dese aelmose in te gadere Wat bruedere in dese aelmosene traghe ware tegaderne hochte onghetrowe ende daer af beproeft ware hi ver borde v s louensche
[12] Vort wat bruedere langher wrachte an siin ambacht op onser vrouwen auonde dan toeter noenen ende tsaterdaghes Ende op elcs apostels auont dan toeter vespertiit Ende op den kerstsauont paeschsauont assensiauont sinxenauont Ende alre heylegerauont dan toeter nonen verborde ij s louensche
[13] Vort wat dat enen bruedere die en gheen struere van sinen w[rc] w[rheit] w[rt] goede gheweest en hadde so commerlec stonde dat hi van commere siin ambacht niet ghedoen en conste soe soudemen hem lenen op goede pande hochte op goede borghen een deel van der gulden goede hem met teghenerne na der gulden vermoghen
[14] Vort wie van den bruederen niet enquame ten wtlede eens anders brueders hen dade hem redeleke noet zake hi verborde vj d louensche
[15] Vort sal ieghelijc brueder in siin testament siin aelmosene gheuen der bruederscap na dien dat hem steet van rijcheiden Wie van haren oyere die aelmosene niet en goude daer toe soudene de heren van der stat dwincghen dat hise gilden moeste
[16] Vort wie van den armen bruederen hochte siin wijf van outheiden van ziecheiden hochte van crancheiden hem seluen ontdraghen en conste dien selen dedekene ende de ghesuorne sine noetdorfte geuen van der bruederscape goede
[17] Vort wie van den bruederen sloetele maecte de slote daer toe behorende en ware tierst te siere smessen bracht hi ver borde v s louensche
[18] Vort es te wetene dat deheren selen heffen dene helft van desen boeten ende van der ander helft sal hebben dene helft destat ende dander helft debruederscap
[19] Vort wie van den bruederen wrachte ane siin ambacht na de slaepclocke sauonts ende smerghens vor de dachclocke hi ver borde ij s louensche
[20] Vort elc leercnape sal gheuen v s te hulpen der bruederscap
</main>
<end>
</end>