Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1270_1

<begin>
</begin>
<main>
Dit sijn die ordinantien ende die statuten die ghemact sijn ende ghe ordineert vor min her gilise berthout van mins heren aluen van mechline ende ouer mids de scepene ende de ghesworne ende de dekene ende der guldebrudere van mechline ende met den ghemeinen ghedueghe dsambachts van den weueren van mechelne omme ghemeine orbore der stat van mechelne ende dsambachts van den weueren Jnt iaer ons heren jncarnations mcclxx in den daghe sente michils Jn derre maniren dat dese ordinantien staen altoes te verbeterne
[1] Dit es die ierste ordinantie dat en ghen knape ne moghe weuen op en webbe binnen mechelne hine hebbe wullen cledere ane die wert sijn iij scellinghe ochte meer ende wie so met heme waue die drieschellewert cledere ane nine hadde hi soude ghilden ene bote van drischellinghen
[2] voert soe wie sine lakene bestaet ieghen enen weuere te weuene omme enen sekeren ende besprokenen loen die weuere moet weuen die lakene omme dien seluen loen ende ontghinghe dien wevere sin gheselle die gheselle die ontghinghe soude ghilden iij s van ere boten ende hi moeste betren sinen gheselle sine scade eer hi meer mochte weuen binnen mechelne
[3] voert so wanneer een portere comt op den kercof te sente rommouds te hurne weueren sine lakene te weuene ende hi enen weuere tote heme roept dat en gheen ander ne moghe comen tote heme ongheropen so wie dar quame ongheropen hi soude ghilden ene bote van ij s
[4] Voert dat een weuera die werc ghenoch heft ter volre weken niet en moghe comen tsonnendachs noch heilech dachs op sente rummouds kercof te stane met den weueren die en ghen werc en hebben te weuene hine hadde dar ander sake te done ende dadit hi uerboerde ene bote van ij s
[5] Voert so wat weuere die makede misdach ocht heileghen dach op maendaghe och op ander daghe die de heileghe kerke niet en ghebode te vierne hi uerboerde v s alse dicke alsit dade
[6] Voert dat ne ghen weuere moghe maken omganc ten ghetowen omme drinke penninghe die dat dade hi uerboerde v s
[7] Voert dat een weuere die vordreuen ochte ghebannen es ute sinen lande omme diefte ochte omme ander quaetheit dat hi nine moghe weuen binnen mechelne hine si tirst vorcleert in sinen lande van sire quaetheit
[8] Voert so wat gueder knapen van den ambachte die viele in een sikeit hi mach hebben enen omganc ende nemmeer te hulpen te sire sikeit ende met den rade der dekene ende der ghesworne
[9] Voert dat de weueren van mechelne nemmermeer ne moghen maken noch vtganc noch scout en ware met den rade der scepenen van mechelne ende der dekenen van der gulden
[10] Voert so wat porteren van mechelne die hurde eneghen knape te weuene sine lakene die nine hadde ane cledere ter werden van drieschellinghen die portere uerboerde iij s
[11] Voert so wat weueren vore ochte ghinghe opt nuwelant ochte op neckerspole te weuene metten ghenen die wederseide te ghildene scout van den ommeganghe van den weueren hi uerboerde ij s
[12] Voert so wat weueren die in heileghe auonde alse de heileghe kerke den dach ghebode te virne langher waue dan toter nonen alse langhe alse none clocke ludde elc weuere die dit dade verboerde ix d en ware also dat dlaken opt ghetowe ware gheweuen tote ere ellen des neme orcunde ende volweue dat laken ende sent thus
[13] Voert so wat weueren die penninghe vorleent ende scout maect ende dar binnen wech gheet sonder verghilden die scout hine mach werken te ghere stat hine hebbe tirst ghenoch ghedaen van dir scout ende hi es sculdech den knape die hem volght om dese scout sine cost [14] Voert so wat weueren die waue buten te dorpe met kersen ocht metter manen ende stolinghe hi moeste ghilden v s eer hi moghte werken binnen mechelne
[15] voert een weuere die nemt daghelicse hure in eens porters hus hurt hi en andren om minren loen dan hi nemt die bate van dien lone es dis porters ende die weuere die des bepruft worde ende die bate van dien lone nine gaue den portere hi waers op en bote van ij s
[16] voert die weuere die platse hout inde weke ende werc heft hi es sculdech en bote van ij s
[17] voert die worde ghewist op ene bote hi ghilde de bote ocht men verbide sinen gheselle te werkene met heme ende die gheselle die met heme wrachte soude ghilden ene bote van ij s
[18] voert alse men gheft jmene een omganc met ghemeinen rade der dekene ende der ghesworne van den ambachte so wie nine gaue een helling ocht enen penning te dien omganghe ocht diet wederseide hi soude ghilden [x]ij [d] van ere boten
[19] vort die weuere die met heme hout en wereld wijf die te velde set hine mach niet weuen alse langhe alse hi es in desen state hine hebbe hem tirst ghebetert ende so wie met heme waue soude ghilden iij s
[20] voert die weuere die wille en andren lieren weuen dien hi liert dat moet sin sins bruder kint ocht sire suster ocht sins oems ocht sire moien ende soe wie dit duet sal gheuen x s ende te kennissen iij s
[21] Voert so wat weuere die hem beclaegh van eneghen portere dat hi hem qualeke ghilt sinen dinst die weuere mach laten dies porters lakene te werkene tote diemale dat men hem vergouden heft sinen dinst
[22] Voert so wat weuere die qualeke tosprect de dekene van der gulden ende de ghesworne van den ambachte der weueren alse gaen omme dorbore dsambachs die ghesworne moghen priueren dien weuere van sinen ambachte na de groette van sire misdaet
[23] Voert so wat weuere die scerde ocht spoelde in eens porters hus ende hijs betught worde hi verborde ij s
[24] Voert eest gheordineert dat so wie vername eneghe misdaet van allen desen statuten dat hise soude voert brenghen den dekenen van der gulden van mechelne ende dit hebben ghelouet de ghecorne van den ambache op hore trowe ende op horen eet vore min her gilise berthout ende vore de scepenen ende de dekene vaste te houdene Ende so wie bade vor ene bote te verlatene hi soude ghilden ij s vor ene bote
[25] voert alle dat recht dat beuolen es den weueren te wisene dat es dat die ghene die onderblift moet ghilden ix d van boten
[26] voert wat weueren die jn ene tauerne ginghe drinken ende hi den weert siin ghelaghe ontdroeghe en quami des anders dages niet vor de none ende betalde siin ghelaghe ende de weert daer ouer moste claghen die weuera verborde ij s
</main>
<end>
</end>