Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1271_1

<begin>
</begin>
<main>
Dit besuec dede doen mijn her wouter Omme dat Dat Gilijs de stoeuere die meier was sheren van mechghelne heme piende al dat hi mochte na de doet mijns her wouters van sottheghem wouteren van sottheghem sinen soene te lettene ende te crenkene aene sijn gherechte ende sinen heerscapen die hi ende sine vorderen te duffle sijn sculdech te hebbene Soe gheuiel dat ouer mids volghene ende claghene wouters van sottheghem mijn her woutere berthout here van mechghelne wouteren berthoude sinen ousten soene met sinen mannen sende tote duffle jnden jare ons heren Doe men screef Dusentech Tuehondert Lxxj Ende doe si daer quamen Doe gheboet men alle die vanden doerpe jonghe ende oude dat si comen souden vore minen jonchere wouteren die vore ghenoemt es Doen nam Gilijs de stoeuere die alre ouste hern heinen van stoutbeke Petere van seinthout Goessenne van soutbeke hern hennekenne van senthout willemme der minnen ende deedtse sueeren dat si segghen souden die beste wareit diese kinden van dien dat wouters recht ware te duffle ende hijr af enne wiste woutere niet noch niman van sinen thaluen Doe riepmen hern heinen van stoutbeeke ende vraghede heme op sinen eet welc wouters recht ware Doe seide heine van soutbeeke dat waren viere ghebrudere ende hieten de kindere ende de heren van hildincshusen die maecten die kerken van duffle op hore Eighen ende hadden alle de gherechten hoghe ende nedere in die side van duffle daer di kerke op steet Vanden enen here quam her Geraert vander Elst wouters oudervader Vanden andren quam die voecht van malle Ende die vander straten Die derde bruder begaf hem ende sijn goedt in den Tempel Die vierde bruder vercochte sijn goedt minen her berthoude die doe was Doe mijn her berthout int dorp comen was doe Tuisten sinen knapen jeghen des heren knapen vander helst alsoe langhe dat die here vander Elst voer ten herthoghe Ende gaf op sijn Eighen dat comen was van sinen vorderen Ende ontfinct vanden herthoghe te leene Doe ontboet die herthoghe min her berthoude dien doe was ende maecte ene heffeninghe Tuschen die heren soe dat mijn her berthout soude hebben die hoghe gherechten van dier siden daer die kerke steet Doe gaf mijn her berthout den here vander Elst enech sach tuschen berlaer Ende rimenam Ende te duffle der vtterste molen vliet metten dike Ende hier af wart hi des herthoghen man Ende nemmeer goeds henne houdt hi van heren Berthoude maer dgoedt van berlaer vercochte mijns her wouters vader oec seide die selue heinrec Dat miin her berthout op wouters late ende sine man neghene preteren noch scutteren henne mochte setten ende settemen op ser berthout beckeren ende brideren ende op sine late eneghen core wouters knape soude alselken coer doen houden sinen laten Ende vilen mesdade op wouters late die soude wouter heffen waer oec dat strijt ochte haerropinghe ware opt wouters sonder bloet ochte slach ter Erden dat soude wouters knape berechten ende heffen die boete tote v scellinghe antwerps Te tuun boeten Ende van waterleden alsoe uerre alse opt wouters vallen soe soude woutere heffen ende gaen sijn knape mets hers berthoudt knape Oec seide die selue heine dat wouters man ende sine late nine waren sculdech te volghene mijn her berthoude buten dorps enne ware in sherthoghen reese Ende wouters late souden sijn vri van beeden ende van allen coerweiden die comen van serbertouds haluen Ende in ghedinghe ofte in eninghen soene soude wouters late niman eeden dane woutere ochte sijn knape en ware ochte wouters man ochte sine late verboerden lijfs ochte goeds ochte ware een dief op tsine ghevaen dies soude hem woutere onderwenden ende leuerne her berthoude ter straten Ende dat woutere met sinen mannen ende met sinen laten mach dinghen daer hi wille waer oec iman die scutte op wouters dat scot soudemen wouteren leueren ochte sinen knape ende dit seidhi op sinen eet Dat dit wouters vorderen hebben bracht tote hare Peter van senthout suoer ende seide al dit selue van waerde te waerde Ende oec seide hi dat hi quam in mijns hers berthous huus op ten bergh Ende quam een man die was ghepandt van ere tuun boeten ende boet min here van sottheghem men dane heme was ghewijst Doe seide min her berthout her woutere nemt dat si v biden hets beter bescoren scaep dane gheuildt Ende oec seide hi ocht ware ghemeine orloghe ofte hervaert wouters knape sal sinen mannen ende laten doen hebben waghene ende part opt sine Ende dit seidt hi dat dit wouters vorderen hadden bracht tote hare Willem der minnen seide al dit selue op sinen eet Gosen van soutbeke seide al dit selue Doe stoet op Woutere berthout in enen verlopenen sinne Dese kerlen nemen minen here al sijn recht Doen seide mijn her paridaen ende her gheraert van merlebosch Ende ghemeinleke ionghe ende oude vanden dorpe dat wouters vorderen aldus hadden tote h[ar]e bracht Ende dit besuec was op ghedaen vor ons Janne hertoge van lothrike ende van brabant vore den here van mechlene ende vore onse man ende was ouer een ghedragen dat wouter van sotteghem ende sine nacomelinge hebben ende behouden souden hore heerscap ende hore gerechten gelijc dat hier vore getuget es emmermeer sonder calaenge Ende oec heuet die here van Mechlenne woutren van sotteghen gelouet dat hi met sinen openen lettren heme bekinnen sal sijn heerscap ende sine gherechten gelijc dat hier vore es bescreuen
</main>
<end>
Ende daer omme hebben wi desen brief doen tekenen met onsen cleinen seghele
</end>