Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1283_1

<begin>
Ale de gene die dese lettren selen sien
</begin>
<main>
ic dommaes ouerste pape van den beghinen houe van megelne ende wi ouerste mestersen van den seluen houe grote wi in onsen here ende doen hen te uerstane dat wi hebben gecoht met den penningen die ons gauen henric baceleer alijt van der nawerstraten ende mergrite hore suster xv s louensche clenre monten iaerlikes siens half te kersauonde ende hal te sinte ians misse te geldene iegen ianne van hombeke op ein bonre winnens lans dat gelegen es agter den bogart die was cer reiners van epengeem dien men heit troien dat arnoud houd dimen heit cropel op enen erueleken siens dese heeft lutgart de beghine ontfaen des vore genomet houes boef met meningen des heren van den gronde ende vonnesse der late ende na den sede ende de costume van den lande van megelne Jn derre maniren dat dese vore genomede xv s louensche iarlikes siens selen heffen ende houden de mesterse van den hus des helegesgeist in der beghinen hof steit van megelne ende de priorinne van den seluen hus soe wie soese siin ten tiden dat men dat gelt dat der vore genomet es sculdech te geldene en keren ane den orbore des hus elker iarlijc met den rade des mesterscapes van den vore gesegeden houe Es oec dat sake dat dit vore genomede hus en bouet en gere holpen binne enen iare ochte ij ochte iii ochte binnen hoe langen dat es alse van dake ochte van wanden ochte eregere hande stucken die ten hus behoren alse war bi thus te vallen mogte werden soe selen die vore genomede mesterse ende de priorinne houden dat dit thelt tote ane der stont dats thus dat der vore genomet es heeft te done ende kerent oec el niwerins ane dane ane thus bouen al dit soe geloue wi dat wi dit hus dat der vorenomet es en selen mogen vercopen in gere maniren no verwandelen maer selent houden tenen gods huse alse lange alshet duren mach
</main>
<end>
Ende omme dat dit vast ende gestedech bliue soe hebbe wi onse segele ane dese lettren gehangen Dese lettren waren gegeuen doemen screef van der gebort ons heren m cc lxxxiij en ginchcenauonde
</end>