Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1283_2

<begin>
Wi scepenen van den niewenlande buten neckerspoele der heinman goetghebuur ende der arnout van scipuort doen cont allen den ghenen die dese lettren sullen sien ende horen lesen
</begin>
<main>
dat ioncvrowe clementie van malre heeft ghecocht ende ontfaen bi maninghen srechters ende bi wiisdoeme der scepenen xx s siaers ter kisten bouf ieghen oliuiere heinrix sone van velpe die hi behuwede met sinen wiue de welke es ians potters dochter dies es sculdech vi s ian van maelbrouc de ene iii s te kersauonde ende de andre iii s te sente ians messe der na Ende heine van den kerchoue es sculdech xiiii s de ene vii s te kersauonde ende de andre vij s te sente ians messe der na Ende dese xx s so gheeft dese vornomde ian van maelbrouc ende heinric van den kerchoue van alden goede dat si ontfinghen van ianne den pottre
</main>
<end>
ende bedi dat ons kenliic es ende wiit wel weten wi vornomde scepenen so ebwiere onse propere seghele an gheanghen Ende dese lettre was ghemaecht int iaer ons heren alsmen scriift mcc iaer ende Lxxx iii sondags na sente ians dach babtis
</end>