Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1289_1

<begin>
Wi scepenen vander heiden buten machline heinriich goetghebuer jan de bere ende lambrecth hasart doen cont allen den ghenen die dese lettere selen sien ofte horen lesen
</begin>
<main>
dat vore ons ende vore den rechtere jan brunoghe quam her gherart van perke de pape ende droech op ene huus met tuen kameren int straetke vore der beghinen hoef te ards boef van hinghene int rechters hant ende te ards boef op xxix s louinsce ghedeelt ende tue capune dene helft te sente ians misse dander helft te kersauonde ende tue capune ofte xvj d louinsce vore die tue capune ende ier op vertech her gherart siens danchs ende met sinen wille op dat huus behoudelike sinen rechte ende sinen sise hewelike theontfane ende sine nacomelinghen met manissen des rechters ende med wiesdome der scepenen soe heft die voreghesegede rechtere den voreghesegeden arde in dit huus gheheruet behoudelike helchs mans rechte ende ier toe es ghesciet al dats soude wesen met enen rechte
</main>
<end>
ende omme dat dit waer es ende seker soe hebwire wi vore ghenumede scepenen onse propere seghelen ane ghehange dese lettere was ghemaket in iaer ons eren als men scriuet m cc lxxxviij in dertiinauonde
</end>