Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1290_3

<begin>
Wi jan Berthaut here van Gramines ende jan Berthaut onse ouste sone doen cont alle de ghenen die dese lettren sien ende horen selen lesen
</begin>
<main>
da wi met ghemeinen consente hebben ghegeuen jacobbe cer Rolefs sone ouer derdalfhonderpont die wi hem sculdech waren Tue bonre moers ende een half die gelegen sijn te kerberghe elc bonre op enen penninch chins te gewere ende te verwandelne op tue penninghe Ende jn dese Tue bonre moers ende een half soe hebbe wi den vore ghenomeden jacobbe doen eruen na de wet ende den sede van dien lande ende met alle dien dat der toe sculdech was te gescine Ende willen dat die vore gheseide jacob ochte sine gebort ochte wi soe dese lettren bringet gebruke van die moere jn wat maniren soe het si si te vercoepene si in andren maniren jn dien dat hijt nine vercope eneghen lans here van den berthauden Ende gelouen ende willen dat die vore gheseide jacob ochte die bode die desen brief bringt hebbe sinen wech te dien more sonder enech weder seggen van ons ochte van onsen nacomelingen te vaerne ende te kerne ende gheorlouen hen dat si moghen drogen torue op onse moer Hijr ouer dese vorwarden ende dit ghelof soe waren onse man pieter van kerberge woutre de clerc ende jan post Ende onse scepenen willem wten dale wouter ser meis ende woutre van keighelbosch alse onse scepenen van onsen lande
</main>
<end>
Ende omme dat wi willen dat alle dese vore ghesprokene dinch vast ende ghestedech bliue Soe hebbe wi dese lettren gesegelt met onsen seglen die waren gemaect int jaer ons heren Dusentech Tve hondert ende Negentech tsonnendaghes vore sinte piters daghe in den jngaenden ouste vore ghespokene
</end>