Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1291_1

<begin>
Alle de ghene die dese lettren sijen ochte horen selen groten de ende de groete mestersen van den beghinen houe van Meglene ende doen hen te verstane de warheit
</begin>
<main>
Bi dien dat jonfrowe lysebeth ende juliane gesustre die men heet van Colputte binnen onsen houe hebben woningen ende huse doen maken ende daer toe tsiens bewijst te houdene mede die selue huse van dake ende van wanden alse in de lettren bescreuen es die der op gemaket sijn welke hus si beide gemeinleke ochte die langst leeft houd te sinen liue ende beghinen wt ende in doen met onsen raede Soe geloue wi dat wi de woningen ochte de huse hijr vore genomt sijn nijt vercoepen no wandelen en mogen nog en selen in en gere maniren maer altoes houden alse almosene huse alsoe lange alse staen mogen ende en ghene beghinen die soe rike sijn datse mogen timmeren daer in ontfaen nog die wollewerch maken hen waren cleder te hors selfs boef nog te ghene die gemeinen vrede nine houden nog onderdenegh en willen sijn den mesterscape Bouen al dit soe geloue wi ende selent oech houden met onsen gemeinen rade ende wille tue weduen tontfaene in de vore genomde woningen ochte huse alse wijs versogth octe gebeden sijn van der voregenomder joncfrowe lysebetten ochte julianen nijt van reghte maer van gratien prouiseurs ende alle de ghene die joncfrowe lysebeth ochte juliane inde voregenomde huse setten ochte daer sijt af eiscen met namen der in laeten alse lange alse leuen ende hen wale houden alse beghinen sijn sculdech te done ende gemeinen vrede ende den mesterscape onderdenech sijn Bouen al dese vorwarden die hijr bouen bescreuen sijn soe geloue wi ende selent oec houden de mestersen van der kisten tontfane in enech van desen vore genomden husen alse van crancheiden der kisten nimmer dienen en mogen ende die dan niet toe en hebben te vane noch huse noch bedde stade Ende oec geloue wi in elc van den seluen husen die hier vore genomt sijn ende daer men conuint in houdt ene werch stat ende ene gast stat te houdene altoes maer thus ane joncfrowe lysebetten porte steet op den hornech te veren ymainen huse wert alsoe saen alse ioncfrowe lysebeth doet es soe bliuet der kisten maer juliane hore suster salre in hebben den zolre te horen huus wert steet te horen liue Noch geloue wi dat wi joncfrowe lysebetten mage ende julianen in dese huse vorder ver sijn selen dane andre lide alse lange alse gode liede sijn gemeinen vrede houden ende den mesterscape onderdenech sijn maer datter jmen enegh regt in eische ochte hebbe ende daer omme coene onrastelech ende den mesterscape niet onderdenech en wille sijn des en wille wi nijt
</main>
<end>
Ende omme dat de voregenomde joncfrowe lysebeth ende juliane begeren dat alle de vorwarden die hier in desen brief sijn bescreuen gehouden sijn eweleke ende wijt oech geloeft hebben soe hebbe wi dese lettren met den segle ons houes ende cer dommaes ons ouers papen tenen orcunde doen seglen Dese lettre was gemaket int iaer ons heren dusentech tue hondert ende negentech des saterdages na onservrowen lichtmesse
</end>