Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1291_10

<begin>
Ane alle die ghene die dese letteren zien zoelen ofte horen Wi tmeesterscap van den Beghinen houe van Mechghelen ontbiden groute met orkontscap der waerheit
</begin>
<main>
Want ons onse liue vrintdinne in onsen here Juliane die es gheheten van Coleputte debeghine heuet ghecoeft bejaghet ofte ghegheuen in alemussenen alse in ghewaregher ghiften tusghen leuende jaerlixere ende erflekere renten te kerne ende te gheuene ewelike na hare ordinantie ende na haren wille in dier maniren dat hier na es bescreuen die gheleghen zien in desen steden zi ghaf ons vijf pont ende zespenninghe tebliuene immermeer ter kisten behoef der armer beghinen van onsen houe die gheleghen zijn in desen steden dat es opt erue dat wilen was heinemans van zoene te Mechghelen drie pont louensgher ende Tienschellinghe louensgher opt derue haren claus van den vliete tspapen ende dandere derteghschellinghe ende zespenninghe louensgher zijn gheleghen an dedenghem strate ende op de Dele De weleke rinten wi hare zoelen gheuen jaerlix ghehelleke alsoe langhe alse zi leuet Ende na hare doet zoe zole wi hir af gheuen Tienschellinghe louensgher margriten Heilewighen ende katelinen harre moyen kinderen van opdorp welcherre dat langher leuet te haren liue Lisbetten van scelle harre niften der Beghinen Twintteghscellinghe louensgher te haren liue Margriten van scelle lisbetten zuster oec Twinteghscellinghe louenscere te haren liue Margriten ende yden die wilen waren tcosters doghtere van henghene Tienscellinghe louensgher te haren liue welc harre dat langst leuet ende Beghine bliuet Voren lisbetten van meldert harre niften Twinteghscellinghe louensgher te haren liue op datse Beghine bliuet katelinen van meldert drie scellinghe louenscere te haren liue op datse beghine bliuet Lisbetten die es gheheten van den sconen heinrix spotters doghter vifscellinghe louenscere te haren liue op dat zi beghine bliuet Ende margriten heinric onolfs bejaghder doghter Derteghpenninghe louenscere te haren liue op dat zi beghine bliuet Ende welc herre dat langst leuet van desen drien achtersten kinderen wederre es een zoe twe op dat si met beghinen bliuen zi zoelen heffen ende hebben der andere deel die doet zijn ofte beghinage laten van desen Tienscellinghen ende zespenninghe mar waer dat zake dat zi weder quamen te beghinagen zoe zouden zi vort meer heffen hare deel van desen ghelde gheheelleke die langst leuede van hen dat si zouden vorlisen alsoe langhe alse vt waren Waer oec dat zake dat van desen rinten iet vile vore Julianen doet metter doet van eneghen van desen vorghenoemden personen ofte met dien dat enech van hen beghinage lite zoe moghsi en anderen persoen dar toe nomen die elx deel name na hare doet te zinen liue Ende dandre Tienscellinghe die dar bouen zijn zolen na Julianen doet tehanght comen ter kisten der armer beghinen van den houe mede te copene vleesgh op den dagh herengilis jaerghetide van hockenzele met andren tienscellinghen die hirre zelue toe besette Ende vort dirste Twinteghscellinghe louenscere die zoelen vallen metter doet der persone die dese rinten zoelen nemen zoelen ghaen te onser kisten mede te copene vleesgh iaerlix op de Chencsendaghe Ende dierste derteghscellinghe die dar na comen salmen gheuen tswitsdonredaghs te wine ter armer behoef van den houe die almussenen nemen vander kisten Ende deghterste vierteghscellinghe ende zespenninghe altemet dat si vallen salmen jaerlix gheuen mede te copene kase ter kisten behoef te deilene den armen beghinen aghter houe Voert meer zoe heuet ons ghegheuen deuorgheseghde juliane een ende derteghscellinghe ende zespenninghe louenscere ende dertiene capune ende enen haluen die sijn gheleghen te meghelne bider hallen ende zescapune die sijn gheleghen bider delen ane dedenghem strate in dire maniren dat si desen Cheens ende dese capune sal heffen gheheelleke alsoe langhe alse zi leuet ende na hare doet zoe zelene heffen iaerlix die drie meestersen van haren tween husen die int hoef staen ende van den derden huse dat si int hof heuet met harre zuster ghemeine ofte twee van desen metten rade van haren drien nighten van opdorp alsoe langhe alser eneghe van hen leuet Ende zelen dar af iaerlikes ghetreuwelike deelen ende gheuen te heren willems iaerghetide van coleputte hars vader in hare hus biden kerchoue int hof te petansen vif capune ende vief scellinghe te dranke Ende te harremoder iaerghetide in dat zelue hus viefscellinghe te ghansen ende viefscellinghe te dranke Ende op hars vader jaerghetide in hare hus darse inne woent int hof te pitansen vire capune ende viefscellinghe te dranke Ende op harre moder jaerghetide oech zesscellinghe ende zespenninghe te pitansen beide te ghansen ende te dranke Ende int hus van opdorp te hars vader iaerghetide vire capune ende enen haluen ende viefscellinghe te pitansen beide te dranke ende te ghansen Ende dandere vif capune die hir bouen zijn salmen iaerlikes gheuen te hars vader iaerghetide int hus dat juliane heeft int hof ghemeine met joncvrouwen lizebetten harre zuster
</main>
<end>
Ende int orcunde van alle desen vorwaerden die hir vore zijn bescreuen Ende dat wise willen wel houden Ende ewelike met goeder trouwen gheleisten zoe hanghe wi onse zeghele beide van onsen ghemeinen houe ende oech van onser cranker femerien ane dese iheghewardeghe letteren Ende dar boeuen zo bidde wi mire joncvrouwen van breda minen here den abt van sente bernarts ende her damase onsen pape dat zijt met ons zeghelen Wi daer ombe Sophie van breda Dabt van sente bernarts ende hare domaes de pape vorghezeghede hanghen hir ane onse zeghele ane dese letteren De welke waren ghescreuen op jaer dat men screef van der jncarnatien ons heren twelefhondert ende een ende neghentegh jaer in den mei [op] [de] [plica] [hand] [B:] den cranken
</end>