Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1291_14

<begin>
Wi scepen vander heyde vander vriheyt buten neckerspoele Heynric goedghebure ende Wouter van gestele ende gelijs van hauere grueten ende maken cont alle den ghenen de nv sijn ende wesen sellen
</begin>
<main>
dat dideric de appelmanghere quam voer ons ende liede des dat hi hadde vercoecht Janne den prouisore van den crankenbeghijnnen xiiij sol ende enen capoen siaers erflike tsijns de ene vij sol ende enen capoen te ghelden tkerssavoents de ander vij sol sente Jansmesse tercrankerbeghijnnen behoef vp al dat goed dat de voerghenometde dideric houdende es van mijn here van machglen dat gheleghen es ten plasche ende dat hise daer toe ghedaen heft met mannesse desheren ende met voentnesse der scepen
</main>
<end>
ende omme dat dit waer es ende zeker soe hebben dese voerghenometde scepen haren zeghele daer ane ghehanghen Ende dese letter was ghemaket Jnt iaer onsheren alse men scriuet m cc xci des woensdaghes na sente baven daghe
</end>