Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1291_2

<begin>
Wi scepenen van der eyden buten neckerspoele arnout van scipuort ende lambrecht hasaert wi doen cont allen den ghenen die nu sijn ende wesen sullen
</begin>
<main>
dat broeder ian van den cranken heft ghecreghen ten cranken bouf xl s siaers erflike jeghen woutren van sente rumbouts up heen erue dat adaem van der minnen oudende was ende dat ian smout oudende es ende ghelegen es biden beghinen oue ende hier toe heft ghedaen dese vor nomde woutre van sente rumbouts ant ende mont dat scepenen seiden dat hiere ghenouch toe ghedaen adde ende desen tsens salmen gheuen na tsheren tsens van den gronde ende alse sulken alse daermen mede coept ende vercoept de ene helft te sente ians misse ende dander helft te kersauonde ende dit was ghedaen bi maninghen srechters ende bi wijsdoeme der scepenen
</main>
<end>
ende omme dat dit waer es ende seker so ebwiere wi vornomde scepenen onse propere seghele an gheangen ende dese lettre was ghemaect int iaer ons heren alsmen scrijft mcc iaer ende xc donres dags na sente mathiis dach
</end>