Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1291_5

<begin>
Wi scepenen van der eyden buten neckerspoele heinman goet ghebuur ende arnout van scipuort wi doen cont allen den ghenen die nu siin ende wesen sullen
</begin>
<main>
dat broeder willem ver benigghenen heft ghecocht erflike tsens ten beggaerden bouf van machline jeghen willem den mersman xviii s ende vi d ende capoen up dat erue dat willen was weins van der hontsbrugghen ende gheleghen es buten sente katelinen porte ende alse sulken tsens alse in borsen gaet de ene helft te sente jans misse ende dander helft te kersauonde ende dit was ghedan bi manigghen srechters ende bi wiisdoeme der scepenen
</main>
<end>
ende omme dat dit waer es ende seker so ebwiere wi vornomde scepenen onse propere seghele an gheanghen ende dese lettre was ghemaect int iaer ons heren alsmen scriift mcc iaer ende xci donresdags na andach paesdach
</end>