Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1292_5

<begin>
Wi scepenen van der eyden buten neckerspoele ian de bere arnout van scipuort claeus de parkementre wi doen cont allen den ghenen die nu sin ende wesen selen
</begin>
<main>
dat pieter van effene heft ghecocht jeghen den here woutren van haren den caneunc ver ghiselen sone van haren sesse ende tertech scellinghe niewes paiments erflike op viere buunre lants die ligghen inden wech te kindevorde waert de hene helft te sinte ians misse ende dander helft te kersauonde ende dit vornomde paiment sal gheuen woutre de bloc iaerliics te alse sulken terminen alse hier vornomt es van desen vornomden erue ende dese vornomde pieter van effene sal gheuen den here van den lande iiii s ende iiii hoenre iaerliics te elken sinte bamisse huut desen vornomde tsense ende dit was ghedaen bi maninghen srechters ende bi wiisdoeme der scepenen
</main>
<end>
ende omme dat dit waer es ende seker so ebwiere wi vornomde scepenen onse propere seghele an gheanghen dese lettre was ghemaect int iaer ons heren alsmen scriift m iaer ende cc ende xcii disendags na alre kinderen dach
</end>