Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1293_1

<begin>
An al de ghene die dese lettren selen sien ofte horen heinric goet gebuer jan de bere ende lambrecht hasart scepenen van den nuwenlande buten neckerspole saluut ende van derre dinc te kenne de warheit wi doen v dat cont
</begin>
<main>
dat bouden de bere es comen voere ons ende heeft dat verliit dat hi vercocht heft brueder heinrike prouisoer van den nonnen van mechelne ten nonnen boef sesscellinghe cleinre gemeinder munten alsulc alse in borse geet ende dar men mede coept ende vercoept te heffene ende te hebne elx jaers erflike op een stucke lands dat men heedt de hofstade Die wilen waren lambrechts hasarts ende die liggen in de bessemstrate naest arnouts cropels erue dene helft te sente jans misse dat hir naest comt ende dander helft ende dander helft te kersauonde dat daer na volgt ende hier in es comen dese vornomde bruder heinric bi manissen tsheren van den gronde ende bi wiisdoeme der scepenen na de sede van den lande
</main>
<end>
ende om dat dit waer ende seker es so hebwiit besegelt met onsen segelen Dese lettre was gegeuen int jaer ons heren m cc xcij sdicendaegs na letare
</end>