Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1293_4

<begin>
Wi jan berthaut here van Gramines ende jc jan ouste zoene oer van Gramines maken cont alle dien die dese lettren sien ende horen selen
</begin>
<main>
Dat vore ons ende vore onse manne es comen ene edele joncfrowe onse liue nighte joncfrowe Sophye van mechlene die wijf was henrijcs wilen heren van breda Ende heeft op gedreghen in onse hande ter beghinen houe boef van mechlene sees bonre bimde viue endevijftech roden min op thoet de Niuerdonch dat men heet Doffelrebimt Ende drie bonre winnenslands ende een half dat men heet poppenrod van welken bimde men ons sal geuen vort meer erfeleke ende onsen oere elker jarlijc vire penninge te sinte bamisse alse selker munten alse gemeinleke in borse geet Ende drie penninge van den lande der seluer munten Ende omme dat wi willen den vore genomden beghinen houe van mechlene gnogh doen soe hebbe wi Euerarde cnape onser liuer nigten joncfrowe Sophien hijr vore genomdes geeruet in de vore genomde bimde ende lant ter vore genomeder beghinen ende houes boef met vonnisse onser manne loduijc berthautds claus van den stene scepenen van mechlene ende boudens van den Echoue ouste zone ser vouters van den Echoue Ende willen dat ment van ons houde terue in alle dijr vorwarden die hijr vore gesproken es
</main>
<end>
Ende omme dat wi willen dat dit vast ende gestedech si ende bliue soe hebbe wi onse segle ane dese lettren gehangen Ende wi loduijc berthaut riddre claus van den stene ende bouden die ouer dese vorwarde waren hebben oec onse segle gehangen ane dese lettren tenen orcunde met den segelen onser liuer heren mijns ser jan berthautds ende jans sijns oustds soens hijr vore gemomden genomt sijn Dese lettre was gemaket int jaer ons heren m cc Drie ende Negentech des donresdages in de chincendage gemomt
</end>