Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1295_3

<begin>
Wi scepenen van neckerspoele heinric kerman arnout van scepuort jan de bere andries van den besseme wi doen cont allen den ghenen die nu sin ende wesen selen
</begin>
<main>
dat ver heilwiich willem goetcoeps wiif was ende kateline hare dochter ende liisbeth hare dochter quamen vor ons ende met monbore ende hebben ver cocht broeder janne van den cranken beghinen ten cranken beghinen bouf int hof ix s ende vi d siaers erfleke alse sulker munten alse daermen mede coept ende vercoept op een erue dat jan noen houdende es ende ghelegen ten ende van der scep vort straten ter eiden waert desen tsens salmen ghilden de ene helft te sinte jans misse ende dander helft te kersauonde ende hier toe heft ghedaen dese vornomde ver heilwiich ant ende mont ende met ghesuoernen hede ten helegen ende vertienesse van hare liiftocht dat soe nemmerme om wat node ofte om wat bersten nemmerme enspreken ensal ende vort ebben dese vornomde kindere ghedaen alse van deser erfliicheit dat scepenen seiden dat siere ghenouch toe ghedaen adde ende dit was al ghedaen met manessen srechters ende met wiisdoeme der scepenen ende huut desen vornomden erue so en gaet nemmeer te tsense dan dese vornomde ix s ende vi d
</main>
<end>
ende om dat dit waer es ende ghestade sal bliuen so hebwiere wi vornomde scepenen onse seghele an gheangen dese lettre was ghemaect int jaer ons heren alsmen scriift mcc jaer ende xcv donresdags in de paesdaghe
</end>