Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1295_4

<begin>
Wi scepenen van neckerspoele heinric kerman jan de bere wi doen cont allen den ghenen die nu sin ende wesen selen
</begin>
<main>
dat joncvrouwe aleit sbackers ende joncvrouwe clemencie van malre hebben ghecregen ter kisten bouf int beghiin hof viertech s siaers erfleke alse sulker munten alse daer men mede coept ende vercoept jegen janne van walem den scemakere op erue dat jan van straesborch houdende es ende op enen wech die behort tesen erue ende ghelegen es neuen dit erue also alse ian van straesborch achterwaert gaet te sinen beemde desen tsens salmen ghilden de ene helft te kersauonde ende dander helft te sinte jans misse ende dit vornomde erue dat es ghelegen tusschen pieter sagis ende wouters van den houte ende dese vornomde erfliicheit die es ghelegen binnen der vriheit van neckerspoele ende daer in es comen in desen tsens dese vornomde joncvrouwe aleit ende joncvrouwe clemencie met manessen srechters ende met wiisdoeme der scepenen
</main>
<end>
ende om dat dit waer es ende seker so hebwiere wi vornomde scepenen onse seghele an gheangen dese lettre was ghemaect int jaer ons heren alsmen scriift mcc jaer ende xcv andach tsinxsendach
</end>