Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1296_2

<begin>
Wi scepenen van der eyden buten machline heinric goetghebur ian de bere arnout van scepuort gielis van heuere jacob wulueric wouter van ghestele gruten ende maken cont allen den ghenen die nu siin ende wesen selen
</begin>
<main>
dat gielis van den cranken heft ghecreghen ten cranken beghinen bouf in de stat jeghen arnoude diemen heet witte broet Neghentiene scellinghe siaers erfleke ende tue hoenre ende alse selker munten alse in borsen gaet op alse selc erue alse jan de weent houdende es ende ian cortals houdende es de tapiit weuere ende dies es sculdech ian de weent erfleke van sinen erue achte s ende tue hoenre siaers ende jan cortals elleue scellinghe siaers erfleke ende dit es al alse selke munte alse in borsen gaet ende desen tsens die salmen ghilden alf te kersauonde ende de hoenre ende dander helft te sinte ians misse ende in desen vornomden tsens so es comen dese vornomde gielis ten cranken bouf inde stat met manessen srechters ende met wiisdoeme der scepenen ende behoudenlec elken man sinen rechte
</main>
<end>
ende om dat dit waer es ende ghestade sal bliuen so hebwiere wi vornomde scepenen onse seghele an gheangen dese lettre was ghemaect int iaer ons heren alsmen scriift m jaer cc ende xcvi in alre heilegen auonde
</end>