Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1297_1

<begin>
Wi meester claus bate deken inde kerke van sente rummouts Mester ian van warloes prochiaen van den beghinen van mechlene Ende brueder willem van sentruden gardiaen vanden minderbruedren vander seluer stat Maken cont alle dengenen die dese lettren sien selen ochte horen lesen
</begin>
<main>
dat wi ens edels mans Godeuarts greuen van vianen Ende here van grimbergen Ende phylips siins wittechs outste soens lettren besegelt met horre beider segele Ende met vele andre goederliede segele die wi hier na noemen Dat es ens gestelecs mans ser wouters bider gratien goeds abts van grimbergen Minser gilijs berthouts heren van honebeke Paridaens van boechhout boudens tfiscers Ende der scepenen van eppengeem hebben gesien van warde te warde in derre maniren Alsegi moght horen

Jc Gedeuart greue van vianen Ende here vanden lande van grimbergen Ende ic phylips sijn wittege outste sone die te minen iaren comen ben Maken cont allen den genen die dese lettren sien ende horen selen Dat wi in also selc goed alse ene edele vrowe vroue ver marie wilen vroue van meclene vercreech iegen onser liuer moeder vrouen veren marien wilen vroue vanden lande van grimbergen Welc goed gelegen es inde prochie van eppengeen hebben geerft heren ianne van steneffle caplaen onser lieuer nichten jonfroue Sophien van mechlene tsoefs boef der beginen van mechlene bi onser maningen Ende bi wijsdome onser man Dats te wetene paridaens van boechout jans van cobbenbosch Gerards vanden mortre Ende ians vanden zipe Ende onser scepenen van eppengeem die hier op getuuchden alse op gerecht erue mette vonnisse Ende naden sede vanden lande Ende metallen dien rechte datter toe was sculdech tegesciene op xLiij d tsiins jarlijcs te kersauonde te gildene also selker munten alse in borsen geet telken tide dat ment gilt Ende ten ockelscen rechte behoudenleke onsen gerechten Ende om dat wi willen dat alle dese vorwerden hier voer bescreuen sijn gestededech ende vaste bliuen eweleke soe hebbe wi Godeuart ende phylips hier vorgenomt onse segele gahangen ane dese lettren in kinnissen der wareit Ende bidden allen den genen die ouer dese vorwerde waren ende segele hebben Dat si hare segele hangen metten onsen ane dese lettren Ende wi her woutre bider gratien gods abt van grimbergen Ende wi gilijs berthout here van honebeke paridaen van boechout bouden de vischere Ende wi scepenen van eppengeem onse segele hebben gehanghen omme de bede vanden vorgenomden partien ane dese lettren Die waren gemaect int jar onsheren doemen screef m cc Ende xcvi des dondersdaech vor tsincsenen inde maent van MeyE

</main>
<end> Ende in kennissen der wareit van allen desen vorgenomden stucken soe hebwi meester claus bate deken vander kerken van mechlene meester ian van warloes Ende brueder willem voergenomde persone onse segele gehangen ane dese lettren Die waren gemact int iaer onsheren doen men screef M cc xcvj tsaterdachs na den andach van dertiendage
</end>