Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1297_2

<begin>
Wi scepenen van der eyden buten machline jan de bere gielis van heuere wouter van ghestele gruten ende doen cont allen den ghenen die nu siin ende wesen selen
</begin>
<main>
dat prouisors van den cranken beghinen int beghiin hof hebben ghegeuen heen stuc lants dat gheleghen es neuen hare molen alsmen gaet te walem waert janne smoute ende aleiten heine rogs wiif op dertien scellinge ende enen penninc alse selker munten alse tien tiden ghinge ende gaue es alsemen tsens es sculdech te gheuene ende dit vornomde lant dat hebsi ontfaen met gheminre ant ende niet besondert ende des lants es een alf buunre xiii roeden min vort so en mach dese vornomde jan no aleit no niemene die na hem mach comen ne gheen hus no neghenen boem no negherande dinc setten op dit vornomde lant dat haerlieder molen deren mach vort so hebben de cranke tien voete lants van desen vor nomden lande tote den voete van den molen berge ende desen tsens dien salmen ghilden de ene helft te sinte ians misse ende dander helft te kersauonde ende dit was ghedaen met manessen srechters ende met wiisdoeme der scepenen ende dit es erfliic tsens ende behoudenlec elken man sinen rechte
</main>
<end>
ende om dat dit waer es ende ghestade sal bliuen so hebwiere wi vornomde scepenen onse seghele an gheangen dese lettre was ghemaect int jaer ons heren alsmen scriift mcc jaer ende xcvi disendags na hagaten dach
</end>