Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1297_3

<begin>
Wi scepenen van der eyden buten machline gielis van heuere lambrecht hasaert wouter van gestele gruten ende doen cont allen den genen die nu siin ende wesen selen
</begin>
<main>
dat broeder ian van den cranken heft ghecregen ten cranken beginen bouf int beghiin hof viertech scellinge siaers erfleke alse selker munten alse in borsen gaet jegen aleiten adaem hasaers wiif was ende jegen wouter haren sone die te sinen iaren comen was alf te sinte ians misse ende alf te kersauonde ende van desen vornomden viertech scellinge siaers so salmen nemen xxviiii scellinge siaers op alse selc erue alse ian de weent houdende es ende mergriete siin wiif dat wilen was aleiten adaem hasaerts wiif was ende wouters aers soens ende dat ghelegen es ande side daermen gaet ten niewen dike waert tusscen wouters zacdragers erue ende daer dese vornomde ian de weent woent vort so salmen nemen elleue scellinghe siaers op alle die erfliicheit die dese vornomde aleit ende woutre haer sone houdende siin ende ghelegen es achter wouters soelslagers ten witten venne waert ende dat gheset es te enen onderpande alse van desen vornomden viertech scellingen siaers vort waer dat sake dat an dese vornomde xxix scellinge hiet ghebrake so sout dit vornomde erue dat achter wouters soelslagers gelegen es wl doen ende hier toe heft ghedaen dese vornomde aleit ende met monbore al dat vonnesse wiisde alse van hare liiftocht ende wouter hare sone van siere erfliicheit ende in dese vornomde viertech scellinge siaers so es comen dese vornomde broeder jan ten cranken beginen bouf int beghiin hof met manessen srechters ende met wiisdoeme der scepenen ende behoudenlec elken man sinen rechte
</main>
<end>
ende om dat dit waer es ende seker so hebwiere wi vornomde scepenen onse segele an gheangen dese lettre was ghemaect int iaer ons heren alsmen scriift mcc iaer ende xcvii smaendags vor sinte marcs dach
</end>