Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1297_5

<begin>
Wi scepenen van der eyden buten machline arnout van scepuort ian de bere wouter van ghestele ende late miere joncvrouwen van breda arnout diemen heet goutboert vranke van retie willem scerre wale gruten ende doen cont allen den genen die nu siin ende wesen selen
</begin>
<main>
dat quam vor ons ende vor den rechtere miere ioncvrouwen van breda bouden diemen heet van conteke ende drouch op broeder ianne van den cranken ten cranken beghinen bouf int beghin hof viertech scellinge siaers erfleke alse selker minten alse ghinge ende gaue es tallen tiden alsmen tsens es sculdech te gheuene op alle die erfliicheit die dese vornomde bouden houdende es van miere joncvrouwen van breda ende ghelegen es inde aesdonc ende naest willems van berkelem vort waer dat sake dat dese vornomde bouden bewiisde binnen machline desen vornomden cranken alse goeden tsens ofte betren so souden dese vornomde cranke houden an desen tsens ende scilden den hersten pant quite die ghelegen es inde aesdonc desen tsens dien salmen altoes ghilden de ene helft te sinte ians misse ende dander helft te kersauonde ende in desen vornomden tsens so es comen dese vornomde broeder ian ten cranken beghinen bouf met manessen srechters miere ioncvrouwen van breda heinrix diemen heet de houwere ende met wiisdoeme derre vornomder late
</main>
<end>
ende om dat dit waer es ende ghestade sal bliuen so hebwi wi vornomde late ghebeden desen vornomde scepenen dat siit besegelt hebben met haren segelen dese lettre was gemaect int jaer ons heren alsmen scriift mcc iaer ende xcvii saterdags vor sente katelinen dach dvornomder
</end>