Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1298_1

<begin>
Ane Alle de ghene die desen brief sien selen De prouiseure Ende douerste meesterscap vanden beghinen houe van mechelne saluit ende kennisse der warheit het si cont v allen dat wi bekennen ende verliien
</begin>
<main>
dat wi sculdech siin Eerre edelre jonfrouwen Onser lieuer jonfrouwen van mechlen die men heet van breda erfleke enentuintech solidos sjaers Gemeins paiments also selc alse in borsen geet in brabant telken giltide half te kersauonde ende half te sentejans misse te heffene op een huis ende een hof van Enen vierdendele lants datter ane leeght es wouters van steilen ende leeght buiten der eedengem porten tuschen veren auen erue van boecscot ende heins erue van boecscot Ende vordane soe orcunde wi dat dat dese voregenoemde edele jonfrouwe dese voregenomde enentuintech solidos sjaers na hore liif gegeuen heeft Ende geset heeft te bliuene inder maniren die hir na bescreuen es Ten jersten male soe heft si gegeuen ende geset dat na hore liif sapientie ende liisbet van heuere hore jonfrouwen de tuintech heffen ende hebben selen te horre beider liue jarliics ochte die lanxt leeft van hen beiden sal die xx s heffen te horen liue jarliics End na al dit soe heeft onse voregenoemde jonfrowe geset tien solidos sjars om gebet te dragene op den dach dat de striit vore woronc was vore miins heren hors brueder sile die daer bleef Ende dar af soe selen de ghene die wi dar toe setten om gebet te gane tueel d hebben Jtem op den seluen dach den prochiaen van onsen houe tueelpenninge jarliics ende den andren papen vanden seluen houe die nu siin ende na comen selen weder si geprouent ochte gehuert siin vier solidos euen geliic onder hen te deilne Jtem op desen seluen dach den scoliren vanden voregenoemden houe achtien d singense Ende en singense niet soe salment den goeden armen geuen binnen shoefs Ende dat hir bouen ouer bliift vanden voregenomden enentuintech solidos dat heeft onse voregenoemde jonfrouwe geset eerfleke quite ende vri te onsen voregenomden houe te bliuene Ende in kennissen der warheit ende omme sekerheit alle der voregenomder stucken soe bidde wi ende begeren ane onser lieuer jonfrouwen die vorgenomt es dat si horen propren zegel alse principael ane dese lettren wille hangen dar na soe bidde wi meester janne van warloes onsen prochiaen dat hi sinen segel alse orcunde ane dese lettren hange want alle dese stucken vore hem gemaect waren die hir voregenoemt siin Ende wi selue de prouiseure ende dmeesterscap die vore genoment siin hebben ten derden male ons hoefs segel gehangen ane dese lettren in kennissen alle der voregenomder warheit Ende wi Sophie van mechelne die men heet van breda ende mester jan die vore genoemt siin hebben onse segele ane dese jedewerdege lettren gehangen na de begerte der voregenomder prouiseure ende smeesterscaeps
</main>
<end>
in orconde als dat vore genoemt es Dese lettren waren gemaect jnt jar onsheren m cc xc viij op Quasi modo
</end>