Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1298_2

<begin>
Ane alle de ghene die dese lettren lesen zelen De prouiseure Ende douerste meesterscap vanden Beghinen houe van mechele Saluit ende kennisse der warheit Het si cundech v allen
</begin>
<main>
Dat onse hof dat voregenoemt es sculdech es wouter bawe Tueelpont sjaers alsoe selker munten alse in borsen geet telken tide dat ment gildt half te kersauonde Ende half te sente jans misse te gildene also lange alse hi leeft Ende weltijt dat weltijt dat hi steerft op dat ver amelberch siin wiif langere leeft dan hi soe sal si tien pont sjaers van ons heffen also lange alsi leeft Ende weltijt dat weltijt dat si steerft op dat woutere horre beider sone langere leeft dan si soe sal hi acht pont sjaers van onz heffen alsoe lange alse hi leeft Ende met hem ochte mette genen die lanxt leeft vanden drien die voregenoemt sijn soe versteruet onsen houe gehelleke ende al tummermeersboof Ende dese tuelefpont sjaers salmen heffen ouer de groete Brugge op de dele op dat erue dat was ser arnout esselenz
</main>
<end>
Ende in kennissen derre waerheit soe hebbe wi ons hoefs zegel ane dese lettren gehangen Dese lettre was gemaect in djaer onsheren M cc xc ende viij in onser vrowen auonde assumptio
</end>