Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1298_3

<begin>
Wi scepenen van der vriheit van neckerspoele woutere van ghestele woutere van rumpade ende ian de beere groeten alle de ghene die dese lettren selen sien ende horen lesen ende doen hen cont met kennissen der wareit
</begin>
<main>
dat her daneel de pape capelaen mire vrouwen van machele heuet vercreghen x s tsiaers erfleecs tseins ghemeins paiments also selcs alse men mede coept ende vercoept ende ghemeinleke in borse gheet op elken dach als men den tseins gheuet op een erue ende op een erfleecheit dat gheleghen es ieghen de beghinen strate op de hergracht daer ian de neue op heuet xl s tsiaers ende woutere van ghestele xx s ghemeins paiments dire vor wt ghaen ende van desen vorghenoemden x s tsiaers salmen ghilden dene helft te kersauonde ende dander helft te sinte ians misse ende te desen x s tsiaers ghemeins paiments erfleecs tseins so es dese vorghenoemde her daneel de pape ghedaen met maennissen srechters ende met wijsdoeme der scepenen dire vor ghenoemt siin ende dire sculdech op waren te wisene als wit ende recht vanden lande wijst ende behoudeleke ieghelijcs rechte
</main>
<end>
ende om dat dit waer es ende wi kennisse hebben van desen dinghen so hebwire wi vorghenoemde scepenen onse propre seghele an ghehanghen dese lettre was ghemaect in diaer ons heren doen men screef m cc xcviij achte daghe na sinte bauen dach
</end>