Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1299_3

<begin>
wi scepenen van der eyden buten machline arnout van scepuort ian de bere lambrecht hasaert gruten ende doen cont allen den genen die nu siin ende wesen selen
</begin>
<main>
dat broeder ian van den cranken beghinen int beghiin hof heft ghecregen met achter volgeden tsense al die erfliicheit die aleit adaem hasaerts wiif was houdende ende woutre haer sone ende die ghelegen es achter soelslagers ende daer toe waren ghedaget alle die hem rechts mochten vermeten den enen dach ende den anderen dach ende den derden dach ende den vierden dach alse houer recht alse waer bi dat niemene voren en quam dan dese vornomde broeder ian daer bi essiere toe gheleit ende in ghedaen met vonnesse met manessen srechters ende met wiisdoeme der scepenen ende behouden elken man sinen rechte vort heft ghegeuen dese vornomde broeder ian willemme diemen heet brant dit vornomde erue te erfliken tsense op xxiiii scellinge siaers ende tue hoenre alse selker munten alse in borsen gaet ende die te ghildene de ene helft ende de tue hoenre te elken kersauonde ende dander helft te elken sente ians misse vort heft gheloeft dese vornomde willem te betemmerne dit vornomde erue redenleke binnen desen iare ende waer oec dat sake dat hiit ghelosen soude so soudiit op geuen met wllen tsense ende
</main>
<end>
om dat dit waer es ende seker so hebwiere wi vornomde scepenen onse segele an gheangen dese lettre was ghemaect int iaer ons heren alsmen scriift mcc iaer ende xcix andach paes dach
</end>