Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1299_4

<begin>
Ane alle de ghene die dese lettren selen sien ende horen lesen Vranke cantre van machelne ende broeder willem van sintruden gardiaen van den minderbruedre in machelne Salut jn onsen here Wi doen te wetene
</begin>
<main>
dat wi heqbben ghesien sgrauen lettren van vlaendren gans gaue ende gheheel in walsche bescreuen ende ghelesen jnt jaer ons heren m cc ende neghene ende neghentech svriendaghes na sinte jans dach vte ganghende ouste jn desen manieren sprekende dat dese brief sprect jn dietsch ghemaect die aldus beghint

Wi Guy graue van vlaendren ende merchgraue van namen doen te wetene hen allen dat wi hebben vercocht wale ende ghetrouwelike bi der hant ons ghetrouwes rogiers van hertsberghe enen godeliken man ende onsen goeden vrient in onsen here den commandeur van den huus van couelenche die men segt van der ordenen van den dietschen huus in den name ende omme die gheseide ordene een ende dertech ende een half bundre ende C ende xxx roeden mours met den gronde behoudenlike dies dat men omme eergherhande ghebreke van moure die vonden waren jnt meten men slaet aue aent ghelt van den vorseiden cope cc ende lxiij roeden met allen den gronde van den ghetale van den bundren ende van den roeden die bouen gheseit siin also dat met den vorseiden cope die wi hem hebben ghedaen die vorgheseide xxxi bundre ende een half C ende xxx roeden siin sculdech tebliuene ende siin hare propre erue na de deuise t die hier na volghen tpaiment nochtan nes men ons niet sculdech tedoene van meer dan van xxxi bundren ende i ghemete ende leghet al dese coep bouen gheseit in tsauetinghe in de prochie van onser vrouwen bi den moure der abdissen van petenghem ende gaet neder tekippesdorpe waerd daer of dat wi hem ghegheuen hebben ouer mids den coep die bouen gheseit es elc bundre omme xl lb van onser munten van vlaendren ende tghemet na die ghelande ende gheloept dese onse coep m cc liij lib vi s viii d van onser gheseider munten Noch so hebben wi hem vercocht wel ende ghetrouwelike bi der hant rogiers die hier bouen gheseit es xxvii bundren ende j ghemet ende xii roeden mours met allen den gronde die gheleghen siin tere stat die men heet west poulre in tsauetinghen in de prochie van sinte laurens bi willems moure van den sveerde in dene zide ende den moure symoens van arterike in dander zide ende hebben hem vercocht ende ghegeuen dbundre omme xxx lb van onser munten van vlaendren tghemet ende de roeden na die ghelande ende gheloept dese achterste onse coep viij c xx lb viii s van onser munten van vlaendren ende doen dese ij summen van desen vercopene ghedaen te gadre Summe ij lxxiij lb ende xiiij s ende viij d van onser gheseider munten Van den welken penninghen al wi houden ons vor ghenoech ghedaen ende vergouden wel ende ghehelike in dese maniere hier na gheseit dats te wetene dat also si dat wi sculdech waren den commandeur bouen gheseit van goeder comanscap ende ghetrouwe alse van wine dat onse lieden cochten jeghen hem ende vor ons ende omme onse pourueanchen ij xxix lb ende xvi s van onser gheseider munten dies hi hadde onse lettren ende daer of dach van paimente leden was ende nochtan hadde hiis ons vriendelike verdraghen Wi te sinen aensoekene ende in onse quitinghe van dien dat wi hem sculdech waren van wine also alse gheseit es daer of dat hi ons weder ghekeert heft onse vorgheseide lettren So hebben wi hem of gheslaghen van der groter summen van den cope van den ij mouren bouen gheseit met allen den gronde ij xxix lb xvi s van onser gheseider munten ende ne bliuen ons dan te ghildene van onsen bouen gheseiden copen van den moure ende van den gronde xliij lb xviij s viij d van onser vorgheseider munten van den welken penninghen die vorgheseide commendeur hefter ons af ghenoech ghedaen ende tonsen ghebode ende jn goeder munten ende wel ghetelt lopende in onse lant ende houdenre ons af ghenoech ghedaen vergouden wel ende ghehelike van den commandeur die bouen gheseit es van al den prise ende van al der waerde van onsen copen bouen gheseit in also goeden ende sekeren paimente alse ochte hiit ons ghedaen hadde in droghen paimente ghetelt goet ende loial ende lopende in onse lant ende hebbens ghequiit ende quiten tallen daghen vor ons onse gheboert Ende nacomelinghe heme ende sine nacomelinghe van dien bouen gheseiden huse ende alle die van der ordenen bouen gheseit ende bekinnen dat dese coep bouen gheseit met allen den gronde wi siin hem sculdech gheleide te doene ghehelike alse ghetrouwe vercopere ende hebben hem gheloeft ende ghelouen loialike ende in goeden trouwen vor ons ende vor onse gheboert grauen van vlaendren te gheleidene ende te warandeirne alse here van den lande dese ij cope die bouen gheseit siin met allen den gronde jeghen allen ouer mids vi d chins siaers te ghildene den ontfanghere van onsen brieuen van onsen renten van daer die cope ligghen alse bouen gheseit es te sinte bamisse alle jaer vort ane comende van elken bundre ende van den ghemeten ende van den roeden na die ghelande Ende es te wetene dat si sculdech siin te hebbene wech ende waterganc omme haren mour te rumene op haren frait ende cost de cope die bouen gheseit siin bi den vorwaerden ende den diuisien ghehouden in dese lettren hebben wi ghedaen behoudenlike ons ende onser gheboert grauen van vlaendren alle gherechte ende herscap jn die gheseide cope ende jn den gront

</main>
<end>
Jn orconscapen van den welken dinghen alle wi hebben doen dese ieghenwerdeghe lettren seghelen met onsen seghele Die waren ghemaect ende ghegheuen jnt jaer van gratien dusentech tvee hondert ende neghentech ende achte tsaterdaghes na ons heren opvaert Ende omme dat wi Cantre ende gardiaen diere voren ghenoemt siin willen dat men desen transcrifte gheloue So hebben ane desen seluen transcrifte onse seghele ghehanghen in orconscap der waerheit dat was ghemaect opt jaer ende op den dach die bouen ghescreuen siin
</end>