Compilatiecorpus Historisch Nederlands 1.0 (CHN): ambtelijke teksten 1250-1800: mechelen_1299_5

<begin>
Ane alle de ghene die dese lettren selen sien of horen lesen Wi vranke cantre van mechelne Ende broeder willem van sentruden Gardiaen vanden minderbroeders in mechelne salut in onsen here Wi doen v te verstane
</begin>
<main>
dat wi hebben gesien ende gelesen jnt iaer ons heren m cc ende xcix jn sente michiels daghe eens edels princh lettren Gwijds grauen van vlaendren ende marcgraue van namen in walsce bescreuen gans gaue goet ende gheheel ende sonder smette ende wel beseghelt met sinen propren seghele vtehangende jn dietsche sprekende aldus

Wi Gwide Graue van vlaendren ende marcgraue van namen doen te wetene tallen dat wi hebben vercocht wel ende wettelec metter hant ons getrous rogiers van hercheberghe enen ordenleken man ende onsen goeden vrient in onsen here den commandeur vanden hues van couelence dat men seit vander ordenen vanden dietchen hues in den name ende ter geseider ordenen boef xxxi ende een halfbuijnre c ende xiij roeden moers metten gronde behouden dien dat om eneghe fauten van moere die vonden waren ter maten men slaet af vanden ghelde vanden cope bouen gheseit cc ende lxiij roeden vanden ghetale der buijnre ende der roeden bouen gheseit Alse waerbi dat om den bouengheseiden coep die wi hem hebben ghedaen de bouengheseide xxxi ende een half buijnre c ende xiij roeden sijn sculdech te bliuene ende sijn haer propre erue na de viseringhen die hier na volghen tpaiement nochtan nes men sculdech te doene ons van meer dan van xxxi buijnren ende enen ghemete Ende leit onse vercoep bouengheseit al in chaeftinghen in de prochie onser vrouwen neuen den moer der abdersen van peteghem ende gaet tale te kippeldorpe weert Daer wi hem af hebben gegheuen mids den cope bouengheseit elc buijnre om xl lb van onser munten van vlaendren ende tghemet int ghelande Ende sommeert dese onse vercoep mccliij lb vi s ende viij d van onser gheseider munten Noch hebbe wi hem vercocht wel ende wetteleke met rogiers hant bouen gheseit xxvij buijnre i ghemet ende xij roeden moers metten gronde liggende in de stat die men heeth westpolre in chaeftinghen in de prochie sente laureins neuen willems moer vanden speie in dene side ende symoens moer van arterike in dander side Ende hebben hem vercocht ende ghegheuen dbuijnre om xxx lb van onser munten van vlaendren tghemet ende de roeden int ghelande Ende sommeert dese onse achterste vercoep dccc ende xx lb ende viij s van onser munten van vlaendren Ende doen de ij sommen van desen ij vercopen geleit te gadre somme ij ende lxxiij lb xiiij s ende viij d van onser geseider munten Vanden welken penninghen algader wi ons houden ouer vergouden ende ghepaijert wel ende gheellec in der maniren hier na gheseit Dats te wetene om dat wi sculdech hadden gheweest den commandeur bouen geseit van goeden cope ende wetteleken alse van wine die onse liede cochten ieghen hem tonsen boef ende om onse pourvancen ij xxix lb xiij s ende viij d van onser geseider munten daer hi af hadde onse lettren ende daer dach van paimente was af leden ende ons hadde nochtan vriendeleke verdreghen Wi te sire versoekinghen ende in onse quitenesse van dat wi hem sculdech waren om wine also gheseit es daer hi ons af heuet wedergegheuen onse bouengeseide lettren hebben hem af gesleghen vander groter sommen vanden vercope vanden ij moeren bouen gheseit met alle metten gronde de gheseide ij ende xxix lb ende xvi s van onser gheseider munten Ende ne bleuen ons dan te gheldene van onsen bouen gheseiden vercopen van moere met alle metten gronde maer xliij lb xviij s ende viij d van onser geseider munten Vanden welken penninghen de bouengheseide commandeur heeft gnoech ghedaen ons ende onsen ghebode in goeder munten wel ghetelt lopende in onse lant Ende wi houden ons ouer vergouden ende ghepaijth wel ende gheelleke vanden commandeur bouengheseit van alden prise ende der werden van onsen vercopen bouengheseit in alse goeden ende sekeren paimente alse dat hijth ons hadde gedaen in droger munten ghetelt goede ende wetteghe ende lopende in al onse lant Ende hebbene ghequijth ende quitenne tallen daghen ouer ons ende ouer onse hoir ende nacomelinghe hem ende sine nacomelinge vanden bouengeseiden huse ende alle de ghene vander ordenen bouengheseit Ende kennen dat de vercope bouen gheseit met alle metten gronde wi sijn hem sculdech doen te ghebrukene gheellec alse wettech vercopre Ende hebben hem gheloeft ende ghelouen wettelec ende in goeder trouwen ouer ons ende ouer onse hoire grauen van vlaendren doen te ghebrukene ende te warandeerne alse here vanden lande de ij vercope bouengheseit met alle metten gronde iegen ons mids vi d ceins iaerlijcs te gheldene den onfangre der brieue van onsen renten van daer daer de vercope liggen also het bouen es gheseit ten daghe sente remijs alle iare toecomende van nu voert ane van elken buijnre ende vanden ghemeten ende roeden int ghelande Ende es te wetene dat se sculdech sijn te hebbene wech ende waterganc om haren moer te rumene op haren propren cost De vercope bouen gheseit metten vorwarden ende den deuisien ghehouden in dese lettre hebbe wi ghedaen behouden ons ende onsen hoiren grauen van vlaendren allen gherechte ende heerscepe in de gheseide vercope ende inden gront Jn orkenscepe der welker dinghe allegader wi hebben ghedaen dese ieghenwordeghe lettre seghelen met onsen propren seghele Die ghemaect waren ende gegheuen jnt iaer van gratien mcc ende achte ende neghentech saterdaghes na den dach vander vpvaert ons heren

</main>
<end>
Ende om dat wi cantre ende gardiaen voreghenoemt willen dat men desen transcrifte gheloue so hebbe wijt gheseghelt met onsen propren vte hanghenden seghelen in kennessen van waerheiden Dat was ghemaect jnt iaer ende in den daghe die bouen bescreuen sijn
</end>