Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1286_1

<begin>
dit weder scrijfte van deser lettren heft der dibbout van den nokere Weten alle de ghene die sijn ende die selen sijn
</begin>
<main>
dat de Prieuse de broedere ende de Sustere van den hospitale van audenarde hebben ghecocht wel ende weetteleke na de vsage ende na de costume van den lande jeghen woutren ser heinrics sone was van peelkem zeuen vierendele lands die ligghen onder sente marien borne an malijn velt in de prochie van Eticoue ende int vonnesse van nieukerke jn de welke zeuen vierendele lands de Prieuse de broedere ende de zustere vorseide Sijn wel ende weetteleke gheervet ende bi sheren wille van den lande ende dwelke landt si hebben vergolden dien vorgheseiden woutren al te gader in ghereden ghetelden peninghen ende dewelke vorgheseide zeuen vierendele lands hebben ghegheuen de vorgheseide Prieuse de broedere ende de zustere den vorgheseiden woutren te enen erfeleken chense omme xxv s parizise elcs iaers te gheldene binnen den iiij kerstdaghen waer oec dat zake dat men niet en golde de vorseide rente alsoet vorseit es binnen den iiij vorgheseiden kerstdaghen Soe soude de Prieuse de broedere ende de zustere die vorseit sijn doen haer hant an dat vorgheseide landt alse an har erue
</main>
<end>
Daer dit was ghemaect was alse rechtere woutre van coningbrouc van mijns heren haluen van audenarde ende daer waren alse scepenen Goesijn van peelkem Pieter smout Der Dibbout van den nokere boidijn van der elst Soykin van der haghen Gillis van den scatputte ende Jan van der steenbrugghen Dit was ghedaen jnt jaer ons heren dat men screef Dusentech Tuehondert vierwaerventvijntech ende zeesse Sondaeghes na haelf marte
</end>