Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1292_1

<begin>
</begin>
<main>
Jnt iaer van gracien mccxcii te kersauonde cochte ioncvroue anes van musebroec wel ende wettelike xi vierendeel lands lettel min of lettel meer ligghende in petenghem in alsulken ghelaghe alst gheleghen es ieghen michiele baerlebane dwelke land men hout van den profst van petenghem om v s ende iii 1/2 d si[ars] Ende die vorseide xi vierendeel lands gaf de vorseide ioncvrouwe anees den vorseiden michiele ende den ghenen diet naer hem houden selen om xxxvi s siars erflike te gheldene te kersauonde ne goudemense niet bin den vier kersdaghen de vorseide ioncvrouwe sloeghe hant an dat vor ghenoemde land gheliic haren erue oec es te wetene dat de houdre van dien lande es sculdech te gheldene de vorseide rente diere vtgaet den vorseiden profst Ende in die xi vierendeel lands vorseit was de vorseide ioncwrouwe anees ghearuet wel ende wettelike na de costume ende dusage van den lande ende
</main>
<end>
dit was ghedaen vore ihan casen gheraerde van den brule gillise den tauernier ihan bonen woitin den ruddre ende vor gillise den cammere scepenen sprofs ende vor gillise den riken baillu sprofs ende sourein baillu miins heer hellins van chison Ende dit was ghedaen te petenghem vor tof onder de linde ende daer leende gillis de rike de stede als sourein
</end>