Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1309_1

<begin>
Cont si alle den ghenen die sijn ende zelen sijn
</begin>
<main>
dat gillis de hont van nukerke heeft ghegheuen ghehalmet ende waerscepe ghelden dien van den hospitale onser van audenaerde jn purre aelmoe-sen ende ouer sine zeele ende jn restore of hi jet hadde van hem tenachter al t lant dat hem toe behorde jn de prochie van nukerke dat es te wetene iiij bunre lettel mer ofte min ligghende jn diversen steden ter littel ghinst ene hofstat ende datter hanghen vij 1/2 dachwant op sente marien borne 1/2 bunre an t steengat j bunre op excoutre 1/2 bunre jtem 1/2 dachwant et van desen vorseyden lande ghinc die vorseide gillis vte wele ende wettelike vor bailliu ende vor scepenen na de vsage ende de wet van den lande svorseit spetaels boef ende spetael wertter daer jn ghearuet wel ende wettelike na de vsage ende de wet vorseit js bi den wille ende bi den consente arnouds here van audenaerde onder wien het gheleghen es behouden sjjns rechts als ware als ware als hi sculdich es de behoudene hier ouer waren dese rase van helleputte willem van der ardbrugghen boidin van arixdale kerstiaen van melden gillis de scoppe als scepenen van melden ende omme dese vorseide dinghen moeten bliuen goed vast ende ghestade esser of ghemaect cyrographie j par houden scepenen van melden ende dander par die van den hospitaelen vorseit
</main>
<end>
ende was ghedaen jnt jar ons heren m ccc ix sdonredaghes na octavi mei
</end>